Мордовиять экономикац

Мордовия Республикань экономикась 2006-2007 кизотнень
Мекольдень кемонь кизотнень Мордовиять экономикац ушедсь кемокснема. 2000 кизотнень ушетксста киза кувалмонь сатфкссь тянь коряс ульсь 15 процент, мезсь етнезень целайнек Россиянь показательхнень.
Мордовиянь экономикать эрекламанц вельде тиевсть полафткст бюджетти дотациятнень сатомаса. 90-це кизотнень кучкаста тя показательсь пачфтьф 60 процентс, 2006 кизоня сон валгсь 28,39 процентти. Тяка пингть Мордовиясь етазень ПФО-ть коряс шабранзон и кеме васта сатсь дотациятнень коряс российскяй региононь омбоце рейтинговай группаса. Мордовия Республикань Оцюнясь путсь задача касфтомс 2008 кизоня республиканскяй ВРП-ть 1,3-крда, мезсь сяда тов лезды республиканскяй бюджетти улемс аф зависимайкс федеральнай трансферттнень эзда.
2006 кизонь итокнень коряс промышленнай предприятиятнень мархта аноклаф товарнай продукцияда 112 процентта сяда лама 2005 кизоть коряс. Тя показательть коряс республикась етазе средняйста российскяй показательть 3-крда (Россиява 104,4 процентта).
Строительстваса 2006 кизоня работатнень лувкссна ламолгодсь 21,3 процентта (минь строителеньке етазь российскяй показательть пцтай 2-крда). Мордовияса велень хозяйствань продукциянь анокламась кеподсь—108,2 процентта (средняйста Россиява—102,8 процентта, сиволень—16 процентта (1,5-крда сяда лама российскяйть коряс) и алда—38 процентта лама (13,5-крда сяда лама целайнек Россиять коряс), лофцта—9 процентта.
Ня результаттнень сатомаса васендакиге оцю путкссна промышленностень тяфтама предприятиятнень, кода:
«Рузхиммашсь» (киза кувалмоста тоса производствать лувксоц етазе 7 миллиард цалковайть), «Сарансккабельсь» (126,5 процент), «Электровыпрямительсь» (118 процент), «Резинотехникась» (103 процент), «Биохимиксь» (115 процент), «ВКМ-Стальсь» (128 процент), «Орбитась» (117 процент), Саранскяй телевизионнай заводсь (пцтай 3-крда сяда лама мелять коряс), Кадошкинскяй электротехническяй заводсь (137 процент), Ардатовскяй светотехническяй заводсь (111 процент), Ковылкинскяй электромеханическяй заводсь (134 процент);
Строительнай индустриянь и строительствань предприятиятне: «Мордовцементсь» (106 процент), «Латось» (112 процент), Завод ЖБК-1» (104 процент), «Железобетонць» (112 процент), «Саранский завод лицевого кирпича» (130 процент), ДСК-сь (114 процент), «Кирпич силикатный» ковылкинскяй заводсь (11 процент), «Саранскстройзаказчик» холдингсь (124 процент), «Мордовпромстройсь» (106 процент), «Мордовстройсь» (121 процент), «Саранскволгонефтехиммонтажсь» (139 процент);
Переработкань предприятиятне: «СанИнтербрю» компаниянь Саранскяй филиалсь (114 процент мелянь показательть коряс), «Мордовспирт» объединениясь (122 процент мелянь тяка пингть коряс), «Атяшевский» мясоперерабатывающий комплекссь (133 процент), «Октябрьская» агрофирмась (107 процент), «Атемарская» птицефабрикась (1,7-крда), «Чамзинская» птицефабрикась (120 процент), «Саранский» молочнай комбинатсь (105 процент), «Ичалковский» сыродельнай комбинатсь (121 процент), «Ромодановсахарсь» (213 процент), «Саранский» консервнай заводсь (259 процент), «Ламзурь-С» (117 процент), «Ламзурь» (106 процент), Макароннай изделиянь Саранскяй комбинатсь (129 процент).
Тя спискась стаки можналь кувалгофтомс. Ламоц предприятиятнень оцю путкссна ся касомати, мезсь ащи главнайкс экономиканьконь эреклафтомаса, вандыень шити основакс.
2006 кизоня властть и хозяйственнай субъекттнень марстонь вийсост пяшкотькшневсь инвестиционнай программась. Тевс максфт пяк эффективнай и социальнай ширде эрявикс инвестиционнай проектт. Целайнек республикава основной капиталти инвестициятне кассть пцтай 18 процентта.
Кемокстась предприятиятнень и организациятнень финансовай ширесна. Прибыльть марстонь лувксоц кассь мелять коряс 1,8-крда. Целайнек киза кувалмоста эксплуатацияс максф 213 тежянь квадратнай метрада лама эряма васта (тя 17,9 процентта сяда лама мелять коряс), тяконь лувксса 80 тежянь квадратнай метра ипотекать вельде, тиф 120 километра газовай и 50 километра водопроводнай линия, строяф 20 километрать малава од и петьф 120 километрада лама автомобильнай ки.
2006 кизоня средняй заработнай платась кеподсь 25,3 процентта, а населениять доходонза—11 процентта ламода. 2007 кизоня аф ляткшневи 2006 кизоть эзда. РМ-нь Экономикань министерствать даннаензон коряс тяддень январьста экономическяй деятельностень виттнень коряс организациятнень оборотсна пачфтьф 8,9 миллиард цалковайс.
Целайнек республикава январьста промышленнай производствать лувксоц 2006 кизонь январть коряс пачфтьф 119,3 процентти. Январьста сиволень (жуватань и нармонень, живста) кассь велень хозяйствань организациятнень эса—18,8 процентта. Лофцонь получамась велень хозяйствань предприятиятнень эса кассь 13,1 процентта. Алонь получамась сембе категориянь хозяйстватнень эса мелянь тяка пингть коряс кеподсь 43,9 процентта.
Велень хозяйствань организациятнень эса эрь траксста потяф 220 килограмма 193 килограммать коряс 2006 кизонь январьста. Республикань строительнай комплексса 2007 кизонь январьста «строительство» деятельностень видть коряс работада тиф 280,1 миллион цалковаень питне или 105,2 процент 2006 кизонь январть мяльс сявозь. Тевс максф пцтай 13,8 тежянь квадратнай метра эряма куд (172 од квартира), мезсь 3-крда сяда лама 2006 кизонь тяка пингть коряс.
Мялень кеподи ня показательхне сатфт сянь вельде, што 2007 кизонь февральста республиканскяй бюджетть доходонза кассть пцтай кафксть мелянь тяка пингть коряс (640 миллион цалковай 2007 кизоня, 360 миллион—2006 кизоня).