Мордовия Республикасо од ломанень политикась

Мордовия Республикасо од ломанень политикась

80-це иетнень прядовомсто – 90-це иетнень ушодовосмсто, вейсэнь стакачитнень печтямонь ды масторонть лавшомгадомань условиятнесэ колавсь од ломантнень марто важодемань лувоськак. Организациятне, конат зярдо-бути ульнесть од ломанень вейкине политикань сехте эрявикс звенакс, лоткасть важодемеде. 1996 иень сундерьковонь 12-це чистэ Мордовиясь масторсонть сехте васенцетнень ютксо примась «Од ломантнеде» республиканской Закон. Седе тов сонзэ ламо положениятне совавтозь федеральной нормативной докумкентнэскак. Закононть примамодо мейле теезель Мордовия Республикань Прявтонть пингстэ од ломанень программатнень вейсэндямост коряс Совет, Од ломанень тевтнень коряс комитетэнтень максозь Государственной комитетэнь статус. 1996 иестэ саезь эрямос ютавтови «Мордовия Республикань од ломантне» программась. Ванкшновсть роботань весе ёнкстнэ, кочказь кадрат, кить машсть, сехте паро жо се, што бажасть роботамс од ломантнень марто. Од ломанень васенце организациятнень перька кармасть вейсэндявомо виев, ёроков ды одонтень бажиця ломанть, кинь токши республиканть сы шказо.

Од ломанень Мордовской республиканской центрась ды Социально-психологической центрась, косо ули кемемань теолефон, ульнесть сы шкастонть покш роботань васенце эскельксэкс. Важодемань васенце ковтнестэ уш неть организациятне эсест рядтнэс тердсть эсест ладсо жо сядот арсицят. 1998 иестэ од ломанень центрась васенцеде ушодсь важодеме республикань районтнэсэяк, райононь администрациятнесэ появасть инспекторт, кить отвечить од ломантнень марто важодеманть кис.

Мордовиянь эйкакшонь организациясь  вейсэндизе сехте эрявиксэнть, мезесь кадовсь пионериястонть. Мордовиясь, паряк, масторонь аволь ламо регионтнэстэ вейкесь, косо эште 90-це иетнень куншкавидстэ панжовсть од ломанень активень лагерть.

Удалась ванстомс весе сехте питнеенть, мезенть таштакшнызе пионерской организациясь. Активень лагертнесэ од ломанень прявтнэнь анокстамонь технологиятнень ней тевс нолдыть лия региононь представительтне. Аволь весть Мордовиянь эйкакшонь организациянть лездамонзо пингстэ республикасонть панжтневсть межрегиональной ды международной лагерть. 1999 иестэ «Зеленая рощасо» активень вейке лагерев сакшнось Российской Федерациянь Президентэсь В.В.Путин.

1996 иестэ теезель Неень шкань киштемань «Визави» театрась. Сон кармась улеме  неень шкань киштемань «Лиса» международной фестиваленть ютавтомань зэмекс. Те уш теевсь коекс. Театранть роботань весе иетнестэ тей сакшность Россиянь сехте ламо региононь, маласо омбо масторонь коллективть.

Теке жо иестэнть кемекставсь республиканть туртов од ломанень эрявикс эште вейке организациясь – Саранск ошсо интеллектуальной творчествань клубось. Мордовиянь Прявтонть лездамось, клубонь сехте паро тевтнес сонзэ сакшномась, лездасть «Мордовиясо ёроков од ломантненень» улемс содавиксэкс аволь ансяк Россиясо, мик омбо мастортнэсэяк. Кавксть Саранскоесь вастась интеллектуальной налксематнень коряс мирэнь кубоконть. Сонзэ налксематнес сакшность Россиясто, США-сто, Германиясто, Израильстэ, СНГ-нь мастортнэстэ кементь сехте паро командатне. Ней те организациясь вейсэнди эрьва кодамо уровенень малав 200 командат. КИТ-нь командатне изнясть интеллектуальной налксематнень коряс Россиянь чемпионатнэсэ, ламоксть ульнесть сонзэ призерокс, яксесть мирэнь чемпионатнэс.

ЮНЕСКО-нь даннойтнень лувсо, Мордовия Республикась ловови од лолмантнень содамочист коряс Россиянь икелев молиця регионтнэстэ вейкекс. Од ломанень политиканть виевгавтомань ламо ёнкстнэнь коряс меельце 10 иетнестэ теезель мик седе ламо, советской шканть коряс. Невтемга, икеле од ломантнень марто важодемань «виде» звенакс ульнесть техникумтне ды училищатне. Сехте паро организациятнестэ вейкекс, конат теезь техникумтнесэ ды училищатнесэ, кармась улеме Мордовиясо тонавтниця од ломанень ассоциациясь. Тонавтниця од ломанень «Арт-Профи» республиканской фестивалесь, кона ютавтови АУММ-со, ней вейсэнди республикасонть тонавтнемань  малав 50 заведеният. Сонзэ сехте покш бажамозо – кастомс робочеень профессиятнень авторитетэст.

2000 иень эйзюрковонь 23-це чистэ весеменень содамга сёрмадстозель Саранск ошонь од ломанень «Ассоциация «Милосердие» общественной организациясь, ков ней совить Мордовиянь студентнэстэ ды школасо тонавтницятнестэ 100 ламо эсь олясо важодицят. Паряк, од ломанень движениясонть сехте паро тевекс кармась улеме Мордовиясо весела ды долка од ломанень клубось. Мордовиянь «Регион 13» сборноесь нурька шкас оштнень ютксо аволь покш фестивальтнестэ, конат ютавтневсть Саранскойсэ 1998-2000 иетнестэ, пачкодсь КВН-нь Высшей лигасо эсь ёрокчинть невтнематнес. Мордовиясь теевсь КВН-нь Поволжской лиганть ютавтомань центракс. Ней КВН-движениясонть эсест ёрокчист ды докачист невтить 200 ламо командат. Республикань школатне лововить эште вейке организациянть – эйкакшонь-од ломанень «Истоки» Мордовской республиканской общественной организациянть важодемань таркакс. «Истоки» общественной движениясь вейсэнди республикань кода ошонь, истя жо велень школатнесэ тевтнень ветямост. Ней те сехте покш ды кеме организациятнестэ вейкесь.

Кеменде ламо иеть республикасонть роботы од ломанень патриотической вейсэндявксось «Поиск». Сонзэ тевезэ – тонавтомс эйкакштнэнь ды од ломантнень патриотизмантень, сыре ломантнень, войнань ветерантнэнь вечкеме; а стувтнемс историядонть, Отечествань чавовозь ванстыцятнеде. Меельце 10 иетнестэ отрядось тейсь 34 экспедицият.

1999 иестэ од ломанень весе организациятне вейсэндявсть Од ломанень республиканской движенис «Созидание». Те движениянь сехте эрявикс тевтнестсэ вейкекс ловови социальной ушодксонь ярмункань ютавтнемась. Мик советской шкатнестэяк савкшнось ансяк арсемс властентень од ломантнень совамодо. Неень шкасто организациянь прявтнэ лововить эрьва кодамо властень депутатокс – Мордовия Республикань велень Советстэ саезь Государственной Собранияс. Мордовиясо теезь ды роботы Од ломанень парламент. 2002 иестэ саезь примазь ды парсте топавтови «Од семиятненень эрямо кудонь максомань» программась. Те программанть топавтомс явозельть 227 миллионт целковойть, тень ютксто федеральной бюджетстэ 77 миллионт целковойть, республикань бюджетстэ 99 миллионт целковойть, тевс нолдазь 51 миллион целковойть аволь бюджетэнь ярмакт. Ансяк меельце колмо иетнестэ неть ярмактнень лангс 768 од семият паролгавтызь эрямонь условияст. Программанть топавтомазо виевгавтызе велетнесэ башка ломантненень кудонь кепедеманть. Те программанть топавтоманзо коряс кевкстематнень лувсо Мордовия Республикась сови Российской Федерациясо икелев молицятнестэ колмотнень юткс. Од ломанень политикантень ярмаконь явоманть коряс (эрьва эрицяс ловозь), Мордовиясь сови Россиянь васенце колмо регионтнэнь юткс. Кемень иес од ломанень политиканть ветямс республикань бюджетстэнть ярмаконь явомась ламолгадсь ведьгемень котоксть! Мордовиясо од ломанень организациятне ламолгадсть 3 саезь 32. Строительной отрядтнэ ламолгадсть 1 саезь 69. Од ломанень политиканть ветямосо сехте эрявиксэкс теевсь ламо организатортнэнь ды прявтнэнь кемекстамась, кить пряст невтизь кода од ломантнень марто роботасо, истя жо республиканть эрямонь лия тевтнесэяк.