Девятаев

ДЕВЯТАЕВ Михаил Петрович

Девятаев Михаил Петрович – пек содавикс советской летчик. Ине Отечественной войнань историяс сон совась покштояк-покш подвигень теезь: немецень салавань аэродромстонть панизе ФАУ-1 самолетонть-носителенть.

Чачсь Михаил Петрович 1917 иень медьковонь 8-це чистэ мокшонь Торбеева поселкасо кретьянинэнь семиясо. Мокшо. Семиясо ульнесь кемголмовоце эйкакшокс. Зярдо сонензэ топодсть 2 иеть, тифсэ сэредемадонть кулось тетязо. 1933 иестэ прядынзе средней школань 7 класстнэнь ды тусь Казанев, арсесь молемс тонавтенеме авиационной техникумов. Документнэсэ кодат-бути колавкстнэнь коряс савсь тонавтнемс леень техникумсо, конань прядызе 1938 иестэ. Теке жо шкастонть тонавтнесь Казанень аэроклубсо. 1938 иестэ Казанень Свердловской РВК-сь тердизе РККА-в. 1940 иестэ прядызе летчикень К.Е.Ворошилов лемсэ Оренбургской военной авиационной училищанть. Кучовсь служамо Торжок ошов. Седе тов ютавтозель Могилев ошов 237-це истребительной авиационной полков (Западной ОВО).

Ине Отечественной войнанть ушодызе 1941 иень аштемковонь 22-це чистэ. Омбоце чистэнть уш эсензэ И-16 самолетсонть тюрсь коштсо. Боевой ловоманть панжизе аштемковонь 24-це чистэ, Минск ошонть маласо прявтызе бомбардировщикенть Ju-87. Мейле ванстсь Московонть велькссэ менеленть. Туланть маласо коштсо вейке тюремасонть, Я.Шнейерэнь марто парасонть, правтызе ятонь Ju-88, ансяк сонзэ ЯК-1 колавкшнось. Девятаевнень савсь валгомс ды понгсь госпитальс. Эште апак пичка, оргодсь фронтов эсензэ полков, кона се шкастонть аштесь Воронеждэнть чивалгома ёно.

1941 иень таштамковонь 23-це чистэ заданиясто велявтомсто Девятаевень лангс каявшность «мессершмитнэ». Сон сынст правтынзе, ансяк сонськак ранявкшнось керш пильгс. Госпитальде мейле врачень комиссиясь кучизе сонзэ састо ливтниця авиацияс. Сон служась вень бомбань ёртниця полксо, мейле санитарной авиациясо. Ансяк 1944 иень панжиковсто А.И.Покрышкинэнь марто вастовомадо мейле сон одс кармась улеме истребителекс.

104-це гвардейской истребительной авиационной полконь (9-це гвардейской истребительной авиационной дивизиясь, 2-це воздушной армиясь, 1-це Украинской фронтось) звенань командирэсь гвардиянь старшей лейтенантось Девятаев коштсо тюремстэ правтсь ятонь 9 самолётт. 1944 иень медьковонь 13-це чистэ ливтясь Р-39 истребителень группасонть, конань прявтсо ульнесь майорось В.Бобров, ятонь авиациянть каявоманзо а нолдамга. Львовонть маласо тюремасонть, косо вийтне ульнесть аволь вейкеть, ранявкшнось вить пильгс. Меельце шкастонть Девятаев кадызе палыця истребителенть, валгсь парашютсо. Покш пицевкс марто саезель полонс.

Кевкстнесть апак лотксе. Мейле сонзэ транспортной самолетсо ильтизь Варшавав абверэнь разведотделэв. Девятаевень пельде питнев кулянь апак маря, немецтне ильтизь сонзэ военнопленнойтнень туртов Лодзинской лагерев. Седе тов ютавтызь Од Кинигсберг лагерев. Тосо, лагерьсэ, ялганзо марто кармась анокстамо оргодемантень. Веть кедьёнкстнэсэ – пенчтнесэ ды вакантнэсэ – сынь чувсть мода алга ютамо тарка, кшнинь панкскетнень лангсо усксесть моданть ды ёртнесть сонзэ бараконть алга (баракось аштесь свая лангсо). Зярдо жо олячинтень кадовкшность ансяк зярыя метрат, ютамо тарканть редизь ванстыцятне. Миицяст ёвтавмонзо коряс оргодеманть анокстыцятнень кундызь. Кевкстнематнеде ды нарьгамотнеде мейле чумондызь куломас.

Девятаев куломас чумондозтнень марто вейсэ ильтязель Германияв Заксенхаузен лагерев (Берлинэнть маласо). Сонензэ прась уцяска: санитарной бараксонть парикмахерэсь, кие ульнесь полонс саезтнестэ, полавтызе куломас чумондозень сонзэ тешксэнть штрафникенть, Дарницасто тонавтыцянть Григорий Степанович Никитенконь тешксэнть лангс, кинь ледекшнизь ванстыцятне. «Шешкицятнень» ютксо Девятаев кандтлесь немецень фирмань карсемапельтнень. Шкань ютазь, подпольщиктнень лездамост вельде, штрафнойстэ ютавтозель свалшкань баракс. 1944 иень ожоковонть прядовомсто сонзэ полонсо кирдевиця 1500 ломантнень марто вейсэ ильтизь Узедом островонть лангсо лагерентень, косо ульнесь Пенемюнде салавань полигонось. Тосо ютавтсть ракетной оружиянь испытаният. Сень мельсэ кирдезь, што полигонось ульнесь салавань, концлагерьсэ полонсо кирдевезтнень туртов ульнесь ютамонь вейке тарка – крематориянь трубаванть. 1945 иень якшамковсто, зярдо фронтось малавгадсь Вислантень, Девятаев полонсо кирдевезтнень Иван Кривоноговонь, Владимир Соколовонь, Владимир Немченконь, Федор Адамовонь, Иван Олейникень, Михаил Емецэнь, Петр Кутергинэнь, Николай Урбановичень ды Дмитрий Сердюковонь марто вейсэ ушодсь оргодемантень анокстамо. Теезель лагеренть маласо аэродромстонть самолётонь саламонь план. Аэродромсо важодемстэ Девятаев салава тонавтнинзе немецень самолётонь кабинатнень. Колазь самолётнэстэ, конат каднозельть аэродромонть перька, сайневсть прибортнэстэ лазнэтне. Лагерьсэ сынст ютавтнесть рузонь кельс ды тонавтнесть. Девятаев явнынзе оргодицятненень тевтнень: кинень эрявсь саемс Питонь трубканть лангсто вельтявксонть, кинень саемс шассинь чарытнестэ колодкатнень, кинень – верев куземань ды мурдамонь рультнестэ струбцинатнень, кинень ускомс аккумулятортнэнь марто крандазкетнень. Тешкстызь оргодемань чинть – 1945 иень даволковонь 8-це чинть. Аэродромов важодеме молемстэ заключеннойтне, кочякасть шка, маштызь ванестыцяст. Истямо ладсо удалась понгомс самолётнэнь аштема таркатнес. Зярдо немецень техниктне тусть обедамо, Девятаевень группась саизе бомбардировщикенть He-111 H-22. Девятаев нолдынзе двигательтнень ды ушодсь руленть стартс велявтомо. Штобу немецтне аволизь нее сонзэ кикс марто оршамонть, савсь каямс сонзэ. Апак редя ливтямс эзь удала – кие-бути муизе маштозь ванстыцянть уровонзо ды кепедсь тревога. “Хейнкелентень” эрьва ёндо чийсть немецень солдатт. Девятаев ушодсь ардомо, ансяк самолетось кувать эзь кепедеве (кода кармасть содамо, апак сае кадовкшность озавтомань щитоктне). Ялгатнень лездамост пинегстэ Девятаев весе вийсэ ускизе шурвалонть эстензэ. Ансяк полосанть песэ “хейнкелесь” явовсь модастонть ды аволь сатышкасто верев кепедевезь, ливтясь морянть велькска. Ёжос сазь, немецтне мельгаст кучсть истребитель, ансяк оргодицятнень редямс сонензэ эзь удала. Девятаев ливтясь, чипаенть мельга ванозь. Фронтонть маласо линиясонть самолетонть леднизь минек зениткатне. Савсь валгомс. “Хейнкелесь” пекензэ лангс валгсь Голлинэнть эйстэ обед ёнов, косо аштесь 61-це армиянь артиллерийской частесь.

Особистнэ эзть кеме, буто концлагерень заключеннойтненень саеви самолетось. Оргодицятнень тевест пек кувать ванкшность, мезесь ульнесь покордавомакс. Мейле ильтизь штрафной батальонтнэс. 1945 иень сундерьковсто Девятаев олякстомтозель запасс. Сонзэ эзть сае роботамо. 1946 иестэ, зепсэнзэ капитанонь диплом марто, эль-эль саизь грузчикекс Казанень леень портс. Кемгавтово иеть сонензэ эзть кеме. Сёрмадсь сёрмат Сталинэнь, Маленковонь, Бериянь лемс, – стяко. Эрямось лиякстомсь ансяк 50-це иетнень прядовомсто.

1957 иень умарьковонь 15-це чистэ М.П.Девятаевнень максозь Советской Союзонь Героень лем.

1957 иестэ сон васенцетнень ютксо кармась улеме ведь ало сёлмо марто “Ракета” пассажирской суднань капитанокс. Седе тов Рав лейганть ветнесь “Метеорт”, ульнесь тонавтыця капитанокс. Пенсияв лисемадо мейле, покш вийть путсь ветеранонь движениянтень, панжсь Девятаевень Фонд, лездась сетненень, кинень лесксэсь эрявсь сехте пек.

Михаил Петрович Девятаев казезь Ленинэнь орденсэ, Якстере Знамянь 2 орденсэ, Отечественной войнань 1-це ды 2-це степенень орденсэ, медальсэ. Мордовия Республикань, Казань (Россия), Вольгаста ды Циновичи оштнень почетной эриця. Торбеевасо панжозь Героенть музей.

Кулось 2002 иень сундерьковонь 24-це чистэ. Калмазь Казанень Арской калмазырень Героень аллеясонть.