Олег Маскаев

2006 иень ацамковонь 10-це чи: минек земляконок Олег Маскаев кармась улеме боксонь коряс мирэнь чемпионокс сехте покш сталмосо

2006 иень ацамковонь 10-це чистэ Угандасто Питер Океллонь марто тюремстэ боксерось Олег Маскаев саизе мирэнь чемпиононь лементь мирсэнть профессиональной боксонь  сехте содавикс организациянь WBC версиянть коряс покштояк-покш сталмосо. Те чистэнть од чемпионозо кармась улеме аволь ансяк Россиянть. Маскаевень кис сэредсь сонзэ тиринь исторической мастороськак – Мордовиясь. Московсо «Олимпийский» спорткомплекссэнть тюремстэ Олег Маскаевень  кис сэредсть 600 ламо ломанть, кить сакшность прявтошов, штобу неемс содавикс земляконть  бороцямонзо. Васенцекс, кие ёвтась земляконтень поздоровт изнявксонть кувалма, ульнесь Мордовиянь Прявтось Николай Иванович Меркушкин. Омбоце чистэнть уш, ацамковонь 11-це чистэ, мирэнь чемпионось сась Саранскоев, штобу ёвтамс сюкпря вишкине родинантень. Боксеронть, кие арасель Мордовиясо 25 ламо иеть, вастасть кши-сал марто.
Мирэнь чемпионось, аэропортсо сонзэ кис  аштицятнень марто кортнемадонть мейле, якась Свято-Федоровской Кафедральной соборов. Храмонтень совамсто сонзэ вастызе Саранскоень ды Мордовиянь Архиепископось Варсонофий. Владыканть Варсонофиень марто кортнемстэ, содавикс боксёрось ёвтнесь, што сон «кеми Пазнэнь ды ловны Библиянть». Владыкась Варсонофий баславизе сонзэ ды мерсь, Мордовиянь весе священнослужительтне озныть эсь содавикс земляконть шумбрачинзэ кис.
Мирэнь чемпиононть тетязо, кие чачсь-кассь Мордовиясо, Александр Маскаев, седе тов ёвтнесь, што Олег – озныця ды Пазнэнь кемиця ломань. Сон лемдязь эште эйкакшпорасто Казахстанонь Джамбул ошсо. Александр Маскаев истя  жо яволявтсь, што мельспаросо цёранзо кувалма ды эзь кавтолдо сонзэ ёндо изнявксонть добовамонзо коряс: «Сон важодеме вечкиця ды кеме ломань, ды бути эсензэ икелев аравты бажамо, свал топавтсы».
Храмонть ванкшномадо мейле, Олег Маскаев сыргась Культурань республиканской дворецэв болельщиктнень марто вастовомо. Мордовиянь Прявтось Николай Меркушкин эсензэ указсо максь спортсменэнтень Мордовия Республикань Почетной эрицянь лем. Бойденть икеле Маскаевнень максозель Россиянь гражданства. Ней минь апак пеле кемевтяно, што мирэнь чемпионось минек земляконок аволь ансяк эсензэ корентнэнь коряс, истя жо «эрямо тарканть сёрмадоманзо коряскак». Теде башка, спортсо ине изнявкстнэнь ды международной уровеньсэ Мордовиянть содавиксэкс тееманзо кис» Олег Маскаев казезель Славань III степенень орденсэ.
Николай Меркушкин залс пурнавозтненень ёвтнесь седе, што Мордовияв Олег Маскаевень самодо сынь кортасть бойденть эште 2 ковдо икеле.
«Исяк бойденть  ды весе эрявикс тевтнень ютамодост мейле Олег мольсь Мордовиянь делегациянтень ды кемекстынзе Мордовияв сыргамодо арсематнень», – мерсь Мордовиянь Прявтось.
Сонсь боксёрось поздоровтнень лангс ответэкс яволявтсь, што сонензэ пек эрявсь Мордовиясто тыщат болельщиктнень лездамост, кить ульнесть залсонть боень шкасто: «Зярдо неинь залстонть транспарантнэнь, конань келемтизь монь земляктне, сеске прям карминь марямо седе кемекс. Монень паро ульнесь марямс эсь корентнэнь лембест. Историянтень велявтозь, эряви меремс, што мокшотне ды эрзятне – кеме ломанть, мокшонь ды эрзянь цёратне жо – сехте виевть».
Жаль, што Олег Маскаевнень эзь саво  молемс эсь покштятнень тиринь таркатнес – Зубова Поляна ёнксонь Вадовской Селищат велев. Эзь удала тензэ ютамс «эсензэ» ульцяванть, конань Вельсоветэсь одс лемдизе чемпиононть-земляконть честьс. Сы шкастонть жо Олег Маскаев, нама, юты Олег Маскаевень ульцява.

Вана мезе жо ёвтнесь эседензэ, эсь родинадонть ды раськетнеде Олег Маскаев «Известия Мордовии» газетантень интервьюсонть:
– Тынк национальностеденк мельтне-арсематне аволь вейкеть. Вейке сайтсонть тешкстазь «Карагандась (Казахстан)», лиясонть жо – «Джамбулось (Узбекистан)».
– Алкуксонь тевсэ жо мон 50 процентс мокшо. Монь тетям Александр Никифорович Маскаев Зубова Поляна ёнксонь Вадовской Селищатнестэ. Сон, армиясо служамодо мейле, кармась тонавтнеме Казахстансо горной         техникумсо, мейле весе эрямонзо перть важодсь шахтасо. Авань Нина Ивановна марто содавиксэкс теевсть Карагандасо, куш сон – кода лиссь – Мордовиянть марто шабрацекс Пензенской областьстэ, пелевидс рузава, пелевидс украинка. Казахстансо важодсь покш заводсо, топавтсь электродвигательтнень туртов уськень тапарямонь тевенть, мезесь сеть шкатнестэ лововсь пек паро роботакс. Мон жо чачинь Карагандинской областень Абай ошсо (тешкстаса, рядсек Сарань ошось). Виде, эйкакшпорасто ды од порасто ламо шка ютавтнинь Мордовиясо. Эрьва кизна каникулав усксимизь Вадовской Селищатнес. Тосо истямо мазый перть-пельксэсь! Лей, вирть, косо ламо ягудат ды пангт, весемесь чувто потсо. Казахстансо жо  – чаво степть. Секскак монень пек вечкевсь яксемс инжекс Мордовиясо эриця бабанень ды покштянень.
– Мокшокс кортамо эзиде тонадо?
– Кортнинь. Ульцясо ялгатнень марто кортнинь мокшокс. Те шкас эзия стувто, кода бабам тердсь «сак сей», «ярхцак», пецькасо пансь тантейстэ качадыця кши.
– Цёракайтнень марто тюрниде?
– Кода весе парсте касыця эйкакштнэ.
– Вадовской Селищатне содавикст раськень бороцямонть коряс.
– Содан, содан. Эйкакшпорасто яксинь Зубовань виев ломантнень тюремаст ваномо. Монсь, виде, сестэ кинь мартояк эзинь варштне вием. Тень кис тетянь покш братось, Костя лелям, аволь весть изнякшнось борецтнэнь пелькстамосо.
– Кода жо тетянк-аванк ванкшнызь бажамонк – алтамс эрямонть спортонтень?
– Тетям весемесэ шнась ды лездась. Сон лови, што спортось – паро тев алкуксонь цёранть туртов, кодамо парсте топавтовиця лия роботаськак. Авам, нама, кода икелеяк,  мелявты, штобу монь кияк пек аволимем чаво, штобу мон киньгак, илязо мере Пазось, аволия томба. Мон эште армиядо икеле покш мель явинь любительской (икеле истя мерсть) боксонтень, тонавтнинь спортивной интернатсо. Тешкстаса, самай тесэ теевинь содавиксэкс сы шкань нинть Светлана марто. Се шкастонть саезь, минь вейсэ уш 20 ламо иеть. Зярдо служинь армиясо, пелькстынь ЦСКА-нь сборноенть кис. Мейле заочна отличия марто прядыя Джамбулсо институтонть. Паряк, самай сестэ лиссть а чарькодемат монь раськексчинть кувалма.
– Ды гражданстванть кемекстамонзо марто ульнесть кодаткак стакачить?
Нама, истя. Зярдо арсинь теевемс профессионалокс, туинь США-в, монь сеске жо саизь Казахстанонь гражданстванть. Те шкас ванстови советской паспортом, косо «национальность» графасонть сермадозь «мордвин». Мон тюринь профессионалонь рингсэ Россиянь флагонть ало, ансяк российской гражданствам арасель. Семиям марто 10 ламо иеть эрятан США-со, миненек максть американской гражданства. Монь авамгак ней эри Штатнэсэ. Тетям жо те шкас Казахстансо. Вана истя уцяскась ёртнимизь мирэнть-масторонть келес.
 Меельцеде Мордовиясо ульнинь эште армиясо служамодо икеле. Нама, ули мелем ютамс тиринь таркатнева, невтемс нинтень, эйкакштнэнень веленть, косо касынь. Паряк, калонь кундамо молемс.
– Арась меленк неемс эсенк эйкакштнэнь спортсменэкс?
– Ансяк аволь боксёрокс! Монь ниле тейтерем. Покшось Аня, сонензэ 20 иеть, кочкизе медицинань тевенть. Александра, сонензэ ковонь ютазь топодить 16, ды 14-иесэ Олеся – тонавтнить школасо. Веженсентень – Викториянень – 4 иеть. Эрь, бути  эште кияк чачи…
– Олег, бути те аволь сепомань тев, мезде кортниде МР-нь Прявтонть марто?
– Спортто. Монь марто сыцятне дивазевсть, што республикань прявтось аволь дипломатической лувонть кирдемга, мусь шка кортнемс косо-бути ине веденть томбале «содавиксэкс» теевезь земляконть марто, – сонсь алкуксонь мель яви спортонтень. Теке марто вейсэ, Николай Иванович, специалистнэнь дивавтомга, пек парсте чарькоди боксонь техникасонть, педе-пес помнясынзе кода мольсть монь бойтне. Спортонтень истямо мелень явоманть пингстэ а савкшны кавтолдомс, што маласо сы шкастонть Мордовиясо кемекстави профессиональной покш боксось. Кеман, Россиясояк профессиональной боксось куроксто виевгады.

Мила МЕЛЬНИКОВА.
«Известия Мордовии» газетась.

Тешкстамга:
Олег Маскаев. Чачсь 1969 иень эйзэрковонь 2-це чистэ. Любительской рингсэ изнясь СССР-нь Вооруженной Виень первенствасонть, Варшавской Договоронь  Организациянь ояксчинь армиянь, Советской Союзонь кубоконь чемпион, аволь весть Азиянь чемпион, 1992 иень мировой первенствань сиянь призер. Ояксчинь армиянь турнирсэнть васенце раундсонть изнизе Виталий Кличконь. Васенцекс профессиональной рингсэ тюрсь 1993 иень чудиковонь 17-це чистэ. Ютавтсь 38 бойть, 33 тюрематнесэ изнясь (сындест 26 – нокаут марто). WBC-нь версиянть коряс сехте покш сталмосо мирэнь чемпион. Сэрезэ – 193 см., сталмозо – 106 кг.