|
|
|
Календарь событий
|
|
|
Мордовия Республикась. Историясь.
|
|
?>Первобытной обществась. Мокшотнень ды эрзятнень государствас вейсэндявомаст ушодовомась. Средней Поволжьянь чивалгома ёнкссонть ломантне кармасть эрямо кевень кезэрень пингестэнть – палеолитэнь шкастонть. Мордовия Республикасто се шкань памятникть зярс апак муе. Муезь сехте васенце эрямо таркатне кандовить мезолитэнь шкантень – кевень пингень куншкавидентень (од пингеденть икеле 9-6 тыщат иетне). Эйтнень соламодост мейле, климатонь бореальной шкастонть, тикшетне-мезтне ды ракшатне кармасть малавгадомо неень шкансетненень. Ломантне кармасть эрямо леень ды эрькень беректнева (Краснослободск ёнксонь Заречной веленть ды Теньгушева ёнксоень Ташто Качеевка веленть маласо эрямо таркатне). Сынь эрясть охотанть, калдонь кундамонть, пурнамонть вельде. Общественной строентень малавикст первобытной родовой общинась ды племенас пурнавомась. Неолитэнь шкастонть, кевень од пингестэнть (од пингеденть икеле колмоце тыщат иетнень 5-1-це пельксэсь, климатонь атлантической ды суббореальной шканть ушодовомась), яла ветявсь саемань хозяйствась, мезентень юрокс ульнесь охотась ды калонь кундамось. Появась гончарной тевесь, коцтонь кодамось, од койсэ кармасть анокставомо кевень кедьёнкстнэ. Тонавтницятне арсить, што неень МР-сь совась кезэрень финнтнэнь-угратнень эрямонь таркатнес (культурань ямочно-гребенчатой керамикань племенатне ды лият). Неолитэсь ульнесь первобытной обществанть виевгадомань шкакс. Се шкань эрямонь таркатне содавикст Ротор, Вад, Мокша лейтнень лангсо. Энеолитэнь шкастонть, пижень-кевень пингестэнть (од пингеденть икеле 3-це тыщат иетнень куншкавидесь – 2-це тыщат иетнень ушодовомась), Мокша ды Сура лейтнень ютксо эрясть волосовской (арсеви – финнэнь-угрань) ды имеркской культурань племенатне. Те шкантень кандови кшнинь (пижень) изделиятнень нолдамось. Тосонь эрицятнень кезэрень койтнеде-кирдатнеде ёвтнить ракшань, нармунень, калонь певтеме теевкстнэ, конат анокстазь кевкстэ ды ловажасто.
Бронзань пингестэнть (од пингеденть икеле 2 тыщат иетнень васенце 25 иетне – 8-7 пингтне) ютазель хозяйствань ветямосо лезэнь кандыця отраслятненень – ракшань трямонтень ды модань соксемантень-видемантень. Кармасть анокставомо важодеманть туртов бронзасто кедьёнкст ды оружия, чары марто транспорт. Кармась редявомо первобытной обществанть лондадомазо. Аватнень прявтсо родтнэнь кемекставомась полавтовсь тетятнень родонь прявтокс аравтомасо. Ландшафтно-климатической условиятне ды хозяйствань вентямонь лувонть полавтовомась пачтясть племенатнень лия таркав эрямо тукшномантень. Неень МР-нть таркас састь абашевской, балановской, примокшанской, срубной культурань племенатне, кить трясть ракшат ды соксесть-виднесть модат. Арсеви, буто сынь ульнесть кезэрень индоевропеецэнь поладыця индоиранской ды протобалтской раськекс. Тосо эрицятнень, сынст ютксто финнтэнь-угратнень, ды сыця племенатнень вейсэндявомаст пингстэ теевсь поздняковской культурась.
Кшнинь пингестэнть (од пингеденть икеле 7 пингесь – од пингенть ушодовомась) неень МР-нь территориясонть ды шабрань областнесэ эрясть городецкой культурань ломантне, мезесь кемекставсь бронзань пингень культуратнень вельде (поздняковской ды финнэнь племенань «текстильной» керамикань культурась). Городецкой племенатнень эрямо таркакс ульнесть оштне ды велетне: Каргашинэнь, Нороватовань, Самозлейкань, Теньгушевань ды лият. Калмамонь памятникть эзть муеве. Ловови, што сынь ульнесть мода лангонь. Городецкой эрицятнень хозяйствас совавтовсть вирень животноводствась, подсечной земледелиясь, охотась ды калонь кундамось. Кшнинь изделиятнень (сехте пек важодемань кедьёнкстнэнь ды оружиянть) анокстасть тескень болотань ды дернань рудатнестэ. Ламо предметнэ анокставсть ловажасто: наконечникть, налт, гарпунт, пельнемкат ды лият. Городецкой племенатне ульнесь кезэрень мокшотнень ды эрзятнень ды рязанско-окской племенатнень, кой-косо – мариецтнэнь ды муромтнень покштякс. Городецкой культуранть кезэрень мокшонь-эрзянь культуракс теевемантень лездасть социально-экономической виевгадомась, лия племенатнень марто шабрацекс эрямось ды седе тов. Кезэрень мокшонь-эрзянь культурань сехте эрявикс ёнкстнэ кемекставсть од пингеденть икеле 1-це тыща иетнень ушодовомсто. Те шкастонть саезь кезэрень мокшотнеде ды эрзятнеде эряви кортамс кода кеменкставозь раськеденть. Котоце пингенть куншкавидстэ мокшотнеде-эрзятнеде содась готонь историкесь Иордан. Васенце тыща иетнень 1-це пельксстэнть кезэрень мокшотне ды эрзятне эрясть Оканть ды Суранть ютксо покш таркатнесэ: Равонь вить берексто саезь Пелеве ёно ды Мокшань ды Сурань ушодовома таркатнень видс Обед ёно. Те покштояк-покш таркасонть мокшотнень ды эрзятнень лиятнеде ве ёно эрямось, лездась сынст кемекставомантень. Пелеве ёно эрицятнестэ (васняяк, неень шкань Нижегордской областень модатне) кемекставсь эрзянь, обед ёно (Верхней Посурьясь, Верх. ды Средней Примокшаньясь, Цнанть чудемань куншкавидесь) – мокшонь раськесь. Неть башка ёнкстнэ эзть меша омбо масторонь ломантненень ловомс мокшотнень ды эрзятнень вейкине раськекс (Mordens), сонзэ эрямо тарканть – вейке масторокс (Mordia – византийской сёрмадовкстнэстэ, Мордовской мода – рузонь летописьтнесэ). Ветеце-кевейкееце пингенть ушодовомсто неень МР-нь пелеве-чивалгома пельксэсь, Теньгушевань Примокшаньясо эрясть рязанско-окской племенатне, кить малавикст кезэрень мокшотненень-эрзятненень (вантано «Шокшань калмазыресь»). Средней Посурьясо, неень Дубёнка енкссонть, 5-7 пингетнестэ эрясть именьковской культурань сыця племенатне (эрямо таркаст Енгалычева, Морга, Николаевка ды лия велетнень маласо). Сынь кеместэ сюлмавкшность тосонь кезэрень мокшотнень-эрзятнень марто. Сайнина веленть маласо Ош Пандо эрямо таркастонть муезь кшнинь тарвазт ды велень хозяйствань лия кедьёнкст. Кезэрень мокшотне ды эрзятне чувность-виднесть мода, трясть ракшат, яксесть охотав кундсесть калт, кирдсть мекшть. Васенце тыща иетнень 2-це пельксстэнть ушодовась модань соксемась. Седе тов виевгадсь кшнинь металлургиясь ды кшнинтень обработкань теемась. Содавикст технологической истят тевтне, кода кшнинь ды сталень сварямось, цементсэ валомась. Покш ёрокчиденть кортыть сиясто ды бронзасто певтеме наряжавкстнэ.
Средней Поволжьянь чивалгома ёно 11-13 пингетнестэ политической обстановкась толковави Русенть ды Волжской Булгариянть ютксо аладямосонть, кавонест ёнкстнэнь бажамосост саемс Мордовиянь модатнень ды ветямс тосо эсест политиканть ды улемс азорокс.
1221 иестэ Ока леенть Равонтень прамо таркасонть кепедезель Н.Новгород ошось, кона теевсь рузонь княжестванть Волжской Булгариянть каршо бороцямонь пек эрявикс форпостокс. Сестэ жо саезельть ошонть маласо мокшонь ды эрзянь модатне. Те шкантень кандови венгрань миссионерэнть Юлианонь пачтямозо «Мордвантнэнь царствадо», косо прявтокс ульнесть 2 чинязт (князть). Сонзэ структурной подразделениятнестэ вейкекс ульнесь «Пургазонь волостесь» Пургазонь марто прявтсо, теде ледстявсь рузонь летописьтнесэ (вантано «Пургазонь Русь»). Арсеви, буто «Пургазонь волостесь» аштесь Мокша ды Тёша лейтнень ютксо, косо 17 пингенть самс ванстовсть Пургазонь лемензэ марто сюлмавозь эрямо таркатнень лемест (Пургазонь ошось, Пургазонь сёлтось ды лият). Тесэ ульнесть мокшонь-эрзянь пек ламо велеть-мезть, конань ютксо Саратовской городищась, ремесленно-микшнемань ды, паряк, политической покш центрась. Археологтнень муевксэст ёвтнить неть модатнесэ сехте ламо эрзятнень ды мокшотнень эрямодо (появасть обед енов ваныця калмт, мокшонь наряжавкст ды седе тов), мезесь корты мокшонь ды эрзянь раськенть вейсэндявомадо. Кемголмовоце пингень 20-30-це иетнень ушодовомсто владимиро-суздальской чинязтнэ зярыяксть кайсевсть Мордовиянь модатнень лангс. Сехте виевстэ – «Пургазонь волостенть» лангс (1228). Мокшонь ды эрзянь модань кезэрень волостесь теевсь Верхней ды Средней Примокшаньясо. Кой-кона тонавтницятне ловить, буто тосо ульнесть Пурешень модатне.
Мокшонь ды эрзянь раськенть политической ды экономической виевгадомась лоткавтовкшнось монголо-татартнэнь каявомсто. Мокшонь-эрзянь модатненень васенце вачкетьксэсь кандозель 1237 иестэ. Мокшонь-эрзянь вейке чинязось, кода сёрмадсь Юлиан, сиведезь ломантнень марто сыргась кемекстазь таркатнес, штобу ванстомс эсь масторонть зярс сатыть вийтне. 1239 иестэ Мокшонь ды Эрзянь моданть лангс одс ульнесь виев каявома. Целанек мокшотне ды эрзятне изнязельть 1242 иестэ. Се шкань сёрматовкстнэсэ тешкстазь, буто монголо-татартнэ, походтнэстэ Западной Европав велявтомсто, «састь Мордвантнэнь модатнес… ды изнизь сынст войнасо» (Чилисама ёнксонь мастортнэс Плано Карпининь ды Рубруконь якамось, М., 1957, с.47).
Мокшонь ды Эрзянь масторось Сырнень Ордань шкастонть. Рузонь централизованной государствантень совамось. Монголо-татартнэнь ёндо саеманть пингстэ, Мокшонь-Эрзянь масторось ёмавтызе азорксчинзэ, теевсь кайсевематнень туртов ды ясаконь пурнамонь таркакс. Кемголмовоце пингень 2-це пельксстэнть Улуса Джучинть (Сырнень Орданть) теемадо мейле, мокшонь-эрзянь таркатнесэ административно-территориальной тевтнень ветямонь юрокс ульнесь чинязтнэнень ды мурзатненень модатнень макстнемась. Содавикс феодалтнэнь ютксо, кинень максовсь права пурнамс тосонь эрицятнень пельде ясак, татартнэнь марто вейсэ ульнесть мокшот ды эрзят. Ордань хантнэнь лездыцякс улезь, мокшонь-эрзянь ды татаронь чинязтнэ яксесть певтеме походтнэс: Кавгадымень марто прявтсо Тверенть лангс (1317), Товлубиянь прявтсо – Смоленскоенть лангс (1340) ды седе тов. Хантнэнь вешемаст коряс мокшотне ды эрзятне соксесть-виднесть модат, строясть ды топавтсть лия тевть.
Кемнилееце пингенть ушодовомсто Мокшонь-Эрзянь моданть лангсо кпедезь Ордань покш административной центра – Мохши ошось, косо 1313 иестэ саезь нолдавсть эсь ярмакт. Содавикс феодалтнэ эрясть покш лейтнень маласо вере таркатнесэ, ков стака ульнесь пачкодемс. Сындест вейкестэнть, Итяковской городищастонть, муезь бранзосто покш сюлгамо, конань Сырнень Ордань администрациясь макстнесь покш таркань заниця ломантненень. 13-14 пингтнестэ кой-зяро мокшотне ды эрзятне –земледелецтнэ, кузнецтне, ювилиртнэ, строительтне – ильтязельть эрямо Сырнень Ордань оштнень малас Средней ды Нижней Равонтень. Сынст культураст тосо ванстовомадо кортыть археологтнень муевксэст (Аткарской, Барбашинской, Муранской калмазырьтне ды лият). Кемнилееце пингень 2-це пельксстэнть, феодалтнэнь ютксо «ине аладямонь» шкастонть, Ордань кой-кона чинязтнэ снартнесть Мокшонь-Эрзянь моданть лангс теемс улуст, конат бу кинь эйстэяк авольть аште: Мокшанть лангсо – Тагай, Равонть маласо – Сегиз-бей. Сестэ жо Примокшаньясо кармась эрямо Ордасто лисицясь Бехан – тататоронь чинязонь фамилиятнень Акчуринтнэнь, Адашевтнень ды лиятнень ушодыцясь.
Кемнилееце пингенть прядовомсто Тимуронь каявоматне пачтясть Сырнень Ордань малав весе ёнкстнэнь тапамонтень, косо мольсть певтеме аладямот. Мохши ошось ёмавтызе Мокшонь-Эрзянь моданть лангсо ханской воластень кирдемань смустенть. Кеветееце пингень 40-це иетнестэ Сырнень Орданть целанек лондавтомадо мейле, кой-зяро мокшотне ды эрзятне понгсть Казаньсэ теевезь ханствантень.
Мокшонь ды эрзянь раськенть туртов сехте эрявиксэкс ульнесь Московонь ды Рузонь кемекставиця централизованной государствантень совамось. Те тевесь мольсь стакасто ды кувать. Тенень тувталокс ульнесь Мокшанть малава, Равонь вить береконь ды Суранть малава мокшонь ды эрзянь модатнень Рязанень ды Нижегородской княжестватненень вейсэндямост. Нижегородской княжествась поладынзе владимиро-суздальской чинязтнэнь политической коест. Кемголмовоце пингенть прядовомсто сонзэ границясь аламонь-аламонь кармась шаштовомо Чивалгома ёнов, малавгадсь Сурань керш береконтень. 1328 иестэ чинязось Константин Васильевич мерсь рузонь ломантненень молемс эрямо Ока, Рав, Кудьма лейтнень кувалт аштиця мокшонь ды эрзянь таркатнес. 1372 иестэ Сурань вить берексонть кепедевсь Курмыш крепостесь. Территориянтень, косо азоркс ульнесь Н.Новгородось, совавтовсть мокшонь ды эрзянь модатне Сурань керш берексто саезь Пьянанть томбале таркатнень видс. 1392 иестэ Московонь ине чинязось Василий I Ордантень макссь конев нижегородской модатнесэ читнязокс улемадо. 1411 иентень Н.Новгородонть лангсо азорокс целанек ульнесть Московонь чинязтнэ.
Кемнилееце пингенть прядовомантень мокшонь ды эрзянь модатне, Цна леенть куншкавидсэ ды Мокшанть ало таркатнесэ совавтовсть уш Рязанень княжествантень. 1444 иестэ мокшотне ды эрзятне Рязанень ды Московонь войскатнень марто вейсэ ушодсть тюреме татартнэнь каршо. 1402 ды 1447 иетнестэ Московонь ды Рязанень чинязтнэ кемекстакшность договорт мокшонь ды эрзянь «таркатнесэ» модатнень явномадост.
Кеветееце пингень 80-це иетнестэ Мокшонь-Эрзянь модань покш пельксэсь совась Московской государствантень. Казаненть марто аладямонть ды ногайтнень ды Крымень хантнэнь сеедьстэ кайсевемаст пингстэ, Рузонь государствась кемекстась чилисема ёнксонь границятнень. Те пачтясь мокшонь ды эрзянь модатнень лангсо од оштнень-крепостнень кепедемантень (Кадом, Темников). Казанень ханстванть каршо ульнесть зярыя каявомат (вантано «Казанень походтнэ 1545-52 иетнестэ»), ков якасть мокшотне ды эрзятне. 1551 иень кизна Равонь вить береконь раськетне кандсть присяга рузонь инязоронтень кемемга, мезесь правань коряс кемекстызе мокшотнень ды эрзятнень Рузонь централизованной государствантень совамост. Казанень ханствась лондавтозель 1552 иень походстонть. Летописьтнесэ сёрмадоматнень коряс, походов якасть малав 10 тыщат мокшот ды эрзят.
Мокшонь-Эрзянь модатне сословно-представительной монархиясонть. 16-17 пингень 2-це пельксстэнть тевс нолдавсь Мокшонь-Эрзянь модань экономикась ды сон совавтовсь рузонь сословно-представительной монархиянь политической ды социальной структурантень. 1552 иеденть мейле тесэ тевс ютавтовсь кода весе Россиясонтькак, тевтнень воеводтнэнь ёндо ветямось, мезесь вейсэндясь военной, административной ды судебной тевтнень. Мересь сонзэ эйс совавтомс мокшотнестэ ды эрзятнестэ сюпавтнень волостной сотникекс, пятидесятникекс. Лиясто мокшотнень ды эрзятнень мельга ваноманть туртов аравтневсть башка должностень ломанть: «мокшонь ды эрзянь прят», приказчикть, кить, васняяк, топавтсть эрицятнень пельде пурнамонь, чумочинь аравтомань ды лия тевтнень. Кемекставсть уездтнэ, конат явовсть станга ды волостька. Мокшонь ды эрзянь модатнень лангсо воеводтнэ тевтнень ветясть засечной тешкстнэнь кепедемстэ, конат лездасть виевгавтомс тосо тевтнень велувсо ветямост. Воеводтнэнь лангс путовсь крепостень ды засекень кепедемань тевесь; сынь кирдсть регионсонть весе властенть. 17 пингень 30-50-це иетнестэ мокшонь-эрзянь таркатнесэ воеводокс ульнесть государствань дока ломантне: Атемарсо – Б.Хитрово (1647); Темниковасо – М.А.Ртищев (1635-36), К.П.Нарышкин (1660) ды лият. Кемготовоце пингенть куншкавидстэ мокшотне ды эрзятне вейсэндявсть Рузонь государствань политической эрямонтень. Те сюлмавсь Ливонской войнань иетнестэ тосонь эрицятнень воевамо саемаст ды засечной тешкстнэнь кепедемаст марто. Шацк – Кадом – Темникова – Алатырь засечной тешксэнть кепедемазо ликястомтызе неть таркатнесэ эрицятнень. Мокшонь ды эрзянь таркатнесэ, модатнень лангсо, конат казевсть дворянтнэнень засечной тешкссэнть служамонь кис, появасть рузонь велеть. Эрьва косо кемекставсь модань сокамось-видемась, тень пингстэ покшолгавтовсть явозь модатне, ламолгадсть эрицятне. Истя, 1565-1623 иетнестэ Арзамасской уездсэ служиця ломантнень модаст ламолгадсть 40 %, дворовойтнень – 20 %. Те жо редявсь Темниковской уездсэяк. Засечной тешксэнь кепедемась ды тосо служиця ломантнень эрямось лездасть мокшонь ды эрзянь модань обед-чилисема енксонть тевс совавтомантень.
Мокшонь-Эрзянь таркатне целанек монархиянть пингстэ. Кемгавксовоце пингестэнть теевсть покш лиякстомат тесэ административной тевтнень ветямосо, мезесь явозель кавто губерниятнень, 5 провинциятнень ды 6 уездтэнь юткова. Петр I шкасто Мокшонь-Эрзянь таркатнень политической виевгадомась мольсь истямо жо лувсо, кода весе Россиясонтькак. XVIII пингенть ушодовомсто политической тевтнень ютксо, конат токизь мокшонь ды эрзянь тиринь таркатнень, – ульнесь 1717 иестэ Кубанень Покш тапамось, мезесь теевсь региононть лангс кочевниктнень меельце каявомакс. Колмоцеде ванкшномань-ловомань (1762-66) материалтнэнь коряс, мокшонь ды эрзянь таркатнесэ эрясть малав 334 тыщат ломанть. Мокшотнеде ды эрзятнеде ульнесть 25 седе аламо процентт, рузтнэде 70 ламо, татартнэде ды лия раськетнеде – малав 5 %. Мордовиясь ульнесь Россиянь велень хозяйствань регионокс: весе эрицятнестэ 96 % – крестьянт.
XVIII пингестэнть Мордовиясо кармасть кемекставомо вотчинань центрат. Саранскоень уездсэнть ульнесть И.Ф.Ромодановскиень, Н.П.Голицынэнь, А.И.Черкасскиень ды лиятнень модаст. 1731-35 иетнестэ Чеберчина велесэ родовой имениясонзо эрясь П.А.Румянцев-Задунайский. Румянцевень модатне сатотсть сонзэ цёранстэнь Н.П.Румянцевнень. Покш имениятнеде башка Мордовиясо ульнесть пек ламо вишкинеть: служиця ломантнень, канцеляриятнесэ важодицятнень эйкакшост-нуцькаст хозяйстватне. Монастырень модатне ды крепостной крестьянтнэ 1764 иестэ сёрмалезельть ды максозельть Экономиянь коллегиянтень тосо тевтнень ветямост туртов. 1706 иестэ Пётр I эсензэ кармавтомасонзо вешсь бойкалгавтомс христианизациянть. Сонзэ ютавтомсто тешкставсь лия койсэ озноматнень сялдомась ды ансяк вейкень шнамось. Те тевсэнть лепштямось ульнесь тувталокс мокшонь ды эрзянь крестьянтнэнь властнень каршо молемаст туртов. Империянь условиясо сехте покшокс ульнесь Терюшевской волостень крестьянтнэнь 1743 иень восстаниясь. Сонензэ тувталокс ульнесь Нижегородской ды Алатырской епископонть Д.Сеченовонь снартомазо лондавтомс Сарлей веленть маласо мокшонь ды эрзянь калмазыренть. Восстаниясь кармавтызе правительстванть ветямс мокшотнень ды эрзятнень коряс лия политика, ды сон ушодсь сэтьме тевтнесэ совавтомо православиянть. Седе покш лезкс максовсь одкс лемдязтненень: 3 иес олякстомтовсть налогтнеде, рекрутокс тердемадонть (вантано «Воинской повинность»), максовсть ярмакт-мезть. Сехте эрявиксэкс ульнесь се, што православиянть саемась, мезесь лововсь государственной озномакс, –вейкендинзе мокшотнень ды эрзятнень эрямонь лувост ды праваст рузтнэнь марто. Мокшотнень ды эрзятнень ютксо православиясь кемекставсь 18 пингень 2-це пельксстэнть – 19 пингенть ушодовомсто. Зярдо сон совавтовсь эрямос, теевсь эрямо лувонь а явовикс пельксэкс.
XVIII пингестэнть Мордовиясо кармась кемекставомо промышленностесь, мезесь сюлмавсь тесэнь сырьянть тевс нолдамонзо марто. Пек седе виевгадсь поташной производствась, конань продукциясь тевс нолдавсь суликань, кедень теемань, сукнань кодамонь промышленностьсэ (вантано «Будный стан»), винань теемасо (иезэнзэ нолдавсь 1,5 миллион ведрат вина). Государствась ульнесь Бриловской, Штырменской ды лия заводтнэнь азорокс. Истя, Бриловской заводось 1772 иестэ анокстась 113 тыщадо ламо, 1774 иестэ – 117 тыщат ведрат вина. Сынст марто вейсэ важодсть помещикень ды купецень заводтнэ. Темниковань уездсэ 1747 иестэ важодсть винань анокстамонь 3 заводт, кавтотнень азорост ульнесть купецть. Харинской заводонть азорокс ульнесь Ростовсто купецесь Я.Симонов. Купецесь А.Миляков ульнесь Ардашевань заводонть азорокс. Те заводонть виезэ – 13 казант вина. Ялатеке Екатеринань указдонть мейле (1782) сындест ламотне пекставсть. Мордовиясо металлургической предприятиятне аволь покшольть: Миляковтнень Рябкинской ды Сивинской заводтнэ, Баташевтнень Виндрейской заводось, Никоновонь Инсарской заводось ды лият (истя жо вантано «Винокуренная промышленность», «Поташное производство»). XVIII пингестэнть келейгадсть Мордовиянь рыночной сюлмтне. Ансяк Саранскоень уездсэ ульнесть 10 ламо ярмункат. Сехте ламо велень хозяйствань продукциянь максыцякс ды промышленной изделиянь рамицякс ульнесть помещиктне ды монастыртне. Кемгавксовоце пингестэнть социально-экономической виевгадомасо Мордовиясь ульнесь Россиянть пельксэкс, кона кеместэ сюлмавозь важодсь лия регионтнэнь марто. Весе Россиянть келес важодеманть явномасо сонензэ явовсь кшинь, спиртэнь, вирень ды химической продукциянь ды лия-мезень нолдамонь тевесь.
18 пингенть прядовомсто – 19 пингень 1-це пельксстэнть Поволжьяв рузтнэнь самост марто лиякстомсь мокшонь-эрзянь обществань кемекставозь лувось. Те шкастонть пек ламолгадсть эрицятне – кавксть. Мокшотнеде ды эрзятнеде ульнесть весе эрицятнестэ нилецекс пельксэсь (204 160 ломанть), рузтнэде – 626 162, татартнэде – 40 688 ломанть. Регионсонть этнодемографической тевтне виевгавтызь рузонь крестьянствань койтнень. Мордовиясо административной ды судебной властесь целанек ветявсь Россиянь правовой системанть лувсо.
Мордовиянь эрицятне виевстэ воевасть 1812 иень Отечественной войнасонть. Таштамковсто уш кемекставсть Пензенской ды Симбирской губерниянь ополчениятне. 1-це Тамбовской пехотной полконть кемекстамосо покш таликазо адмиралонть Ф.Ф.Ушаковонь. Ятонть тапамодо мейле крестьянтнэ арсесть крепостной лепштямодонть олякстомтовомадо. Инсарской ды Саранской полконь ополченецтнэнь ютксо ютась куля инязоронть ёндо указонь нолдамодо, конань коряс войнасонть весе воевицятненень максови олячи, ансяк буто дворянтнэ тень сёпить. Ушодовсть талномат-кавтолдомат, мезесь ютась наяв каршо молемантень. Тенень ламосо лездась казнань саламось, ирецтиця симемапельтнень симнемась ды офицертнэнь ёндо нарьгамось. Ацамковонь 9-це чистэ кпедсь Инсаронь ополченецэнь полкось, ацамковонь 10-це чистэ – Саранскойсэ пехотань 1-це полкось (вантано «Восстание ополченцев 1812»). Пензань ды Симбирскоень ополчениятне яксесть омбо масторонь походтнэс. 1813 иень кизна сынст полктне ульнесть уш Варшавской герцогствасо. Таштамковонть прядовомсто Поволжьянь ополчениясо тюрицятненень мерезель саемс Дрезденэнть. Ожоковсто тосонь гарнизонось яволявтызе прянзо изнявозекс. Ацамковсто Магдебургонть кис тюремстэ покш смелчи невтсь Пензань конной полкось. Седе тов Пензань ды Симбирскоень ополчениятне олякстомтсть Богемиянть, Саксониянть ды Пруссиянть. Бородинской паксясонть пряст а пелицякс невтизь офицертнэ ды генералтнэ братнэ Н. ды А.Тучковтне, Струйскийтне, Римскийтне-Корсаковтне, Дурасовтне, Филатовтне, рядовойтне Булычёв, Комиссаров, Саранскоень уездэнь Вырыраева велестэ Т.Давыдов жо казезь зярыя орденсэ.
Олякстомтомань (декабристской) движениянь кой-кона участниктне сюлмавозь мокшонь-эрзянь моданть марто. Сынст ютксо Н.И.Тургенев. Московской университетэнь пансионсо тонавтнемадо икеле эрясь тетянзо имениясо Ардатовской уездэнь Тургенева велесэ. Сонсь 1825 иень восстаниясонть арасель, ялатеке чумондозель куломас, мезесь мейле полавтовсь каторгасо. А.А.Тучков, Отечественной войнань героесь, совась Благоденствиянь союзонтень. Арестовазель, судтонть жо олякстомтозель ды кармась эрямо эсензэ имениясо Инсарской уездэнь Яхонтова велесэ, косо панжсь школа, библиотека, больница. Благоденствиянь союзонь членэкс ульнесь Г.А.Римский-Корсаков, кие ламо иеть эрясь Инсарской уездэнь Голицына велесэ. Ансяк границянь томбале кувать улемась ванстызе сонзэ арестовамодонть. Темниковской уездэнь Веденяпина велесэ чачсть декабристнэ Алексей Веденяпин ды Аполлон Веденяпин. Мордовиянть марто сюлмавозь Н.П.Окарёвонь лемезэ. Россиянь эрицятне, сынст ютксто мокшонь-эрзянь таркатнесэяк, явовсть 5 сословиява – крестьянт, дворянт, духовенствась, мещантнэ, купецтне. XIX пингень куншкавидестэнть весе крестьянтнэнь ламолгадомсто, пек седе аламолгадсть азорокс улиця ды удельной крестьянтнэ. Те толковави аволь ансяк лезксэнть лоткавтомасо, солдатокс максомасонть, истя жо чачтоманть аламолгавтомасо. Мокшотнестэ ды эрзятнестэ крепостнойкс ульнесть 10 908 ломанть (5,3 %), государственнойкс – 136 783 (67), удельнойкс – 56 469 ломанть (27,7 %). XIX пингень куншкавидентень государственной крестьянтнэ ламолгадсть весе уездтнэсэ, Ардатованседенть башка. Государственной крестьянтнэнь ламолгадомань тувталтнэстэ вейкекс ловови Киселёвонь реформась, конань пингстэ Пензенской губерниянь уездтнэсэ, конат мейле совавтовсть Мордовияс, те разрядонтень ютасть 37 тыщат удельной крестьянт – цёра ломанть.
XIX пингестэнть сехте ламо мануфактуратне ульнесть арендас саезь модатнесэ. Неть таркатнесэ промышленной производстванть ладямосо покш таликазо винань анокстамонь отраслянть, мезесь 1861 иень реформадонть икеле малав целанек ульнесь дворянтнэнь кедьсэ. Дворянонь заводтнэнь каршо пелькстасть ансяк 2 казёнойть: Бриловскоесь ды Троицко-Острожскоесь. XIX пингенть ушодовомсто паро тевекс ульнесть металлургической заводтнэ: Сивиненсесь ды Авгуронсесь – Н.Д.Манухинэнь, Виндрейскоесь – Т.М.Очкинэнь, Рябкинскоесь – А.И.Шапкинэнь, Инсаронсесь – М.В.Никоновань.
XIX пингень 2-це пельксстэнть яла кемекставсть капиталистической отношениятне. Сынст бойкасто виевгавтызь буржуазной реформатне, васняяк, крепостной праванть лоткавтомась. 1861 иень даволковонь 19-це чинь «Положениясь…» макссь олячи 292 тыщадо ламо (39,4 %) крепостнойтненень, сынст ютксто 9,9 тыща мокшонь ды эрзянь, 4,4 тыща татаронь крестьянтнэнень. Ялатеке модань явомсто икелень крепостной крестьянтнэ ёмавтызь реформадо икелень 13,6 ламо процент модатнень, 13 % лиссть олячис казезь мода марто, среднейстэ 0,8 десятин эрьва ломаньс. Рамазь модась лиссь алкуксонь питнеденть 3,6 раз седе питнеекс. Мордовиясо удельной велень реформась лиякстомтынзе малав 90 тыщат (12,1 %) крестьянтнэнь эрямост, сындест сехте ламотне эрясть Ардатовской ды Алатырской уездтнэсэ, косо 63 % эрицятне эрзят ды мокшот. Помещикень крестьянтнэнь коряс сынь ёмавтсть седе аламо, ялатеке сыненсткак модась стясь кавксть седе питнейстэ. Государственной крестьянтнэнь тевест аграрной реформанть молемстэ ды седе мейле мольсть седе парсте, удельноенсетнень ды помещикенсетнень коряс. Мордовиясо сынст юткс совасть 360 тыщадо (48,5 %) ламо крестьянт, эйстэст 66,4 % мокшот ды эрзят, 88 % татарт. Сынь ютавтозельть эсь хозяйствань ветиця крестьянтнэнь юткс, ды ванстовсть седе икеле явозь модаст. Пингеде-пингес пользовамос максозь модань 1 десятинанть кис пандсть оброк (среднейстэ 1 целковой 6 трешникть). 1886 иестэ оброкс ды рамамонь пандоматнес ютавтозь, сыненст максозь кадовикс крестьянтнэнь марто вейкеть прават. Тень пингстэ Пензенской, Симбирской ды Тамбовской губерниянь уездтнэсэ 1 десятинанть кис пандсть седе аламо ды явозь модатне ульнесть седе покшт, икелень удельной ды помещикень крестьянтнэнь модаст коряс. Неень Мордовиянь территориясо 1877 иестэ среднейстэ вейке ломаньс лововсь 4,9 десятина, икелень удельтнойтнень жо – 3,4, помещикень – 2,1 десятина. Лисни, эрьва кодамо категориянь крестьянтнэнь ёндо моданть тевс нолдамосо а вейкетьксчинть реформась эзизе вите, мезесь седе тов лиякстомтызе сынст экономической ды социальной эрямост.
Мокшонь-Эрзянь масторонть туртов пек эрявиксэкс кармась улеме 1864 иень земской реформась. Уездэнь земстватне лездасть виевгавтомс народной образованиянть ды медицинанть, ладямс пожаронь а нолдамонь тевенть, кепедемс кить ды седе тов. 1860 иестэ тесэ ульнесть 37 низшей училищат, 1883 иентень – 394, сындест пелест панжызь земстватне. Земской учреждениятне кармасть ютавтомо седе ламо ярмакт. 1893 иестэ весе уездной земстватне образованияс ютавтсть 78,7 тыща целковойть, 1900 иестэ ансяк Инсаронь, Краснослободскоень, Норовчатонь ды Саранскоень земстватне ютавтсть 60 тыщат целковойть. 110 тыщадо ламо целковойть явозельть медицинантень. Раськетнень содамочист кастомасо покш таликаст земской деятельтнень-педагогтнень И.Н.Ульяновонь, В.Х.Хохряковонь, Н.И.Ильминскиень, А.Ф.Юртовонь, М.Е.Евсевьевень, Н.П.Барсовонь, врачтнень – Н.Ф.Филатовонь, П.Ф.Филатовонь, В.С.Левитэнь, А.И.Рудявскиень ды лиятнень. Народной образованиянть ды медицинанть виевгадомаст лангс апак вано, сынст эйсэ тевтне мольсть аволь сатышкасто парсте. 1809-1910 иетнестэ 1 тыща эрицяс савсть 20 тонавтницят, 1917 иестэ весе эрицятненень савсть – 60 врачть ды больницятне ульнесть 584 ломаньс.
1870 иень аштемковонь 16-це чистэ тевс нолдавсь од «Городовой положениясь», конань коряс тевтнень ветямонь сословиянь органтнэнь таркас кочкавсть весе сословиянь ошонь думат.
1862-64 иетнестэ ютавтозь местной военной управлениянь реформа. Теезельть 15 войскат. Сынь кирдевсть Мордовиянь территориясо, совасть Казанень ВО-нтень (1-це губернской военной начальникесь – генералось-майорось А.К.Макаровский). Военной службас весень тердемадо Александр II указдонзо мейле, мокшонь-эрзянь таркатнесэ теезь воинской повинностень коряс губернской ды уездной присудствият. Ютавтовсь судебной рефорома. Судебной од уставтнень лувсо теезь судебной учрежденият весе сословиянь ломантнень туртов. Кемекставсь присяжной заседателень, прокуратурань, адвокатурань ды судебной следователень институтось. 1868 иестэ Саранскойсэ чрезвычайной уездной земской промкссонть кочкавсть участковой мировой 5 судьят. Почетной мировой судьякс аравтозельть купецтне Коровин, Кубанцев. Мордовиянть обслужовасть Пензенской, Симбирской, Нижегородской ды Тамбовской окружной судтнэ. Сехте эрявикс тевтне ванкшновсть Саратовань палатасонть.
Крестьянтнэнь ёндо модань соксемань-виднемань тевенть пек лиякстомтызе Столыпинэнь аграрной реформась. Сонзэ ютавтомань 10 иетнень перть 14,6 % крестьянтнэ кемекстызь азорксчист 9,3 % моданть лангс. Отрубной ды хуторонь хозяйстватне сатышкасто парсте эзть виевгадо: 21,8 % крестьянонь кудотнестэ, конат яволявтызь моданть лангс праваст, сындест лововсть малав 38 % (5 % весе хозяйстватнестэ). Башка ломанень модатнень одс явшемась, васняяк, теевсь вишкине имения марто дворянтнэнь вельде, кить совсесть долкс ды сайнесть заемт, эзть машто виев ды лезэнь кандыця капиталистической хозяйствань ладямо ды розорявомаст вельде ламолгавтызь мещантнэнь. Покш поместьяст ульнесть кезэрень дворянонь родтнэнь Гагаринтнэнь, Куракинтнэнь, Енгалычевтнень, Араповтнень, Батюшковтнень, Столыпинтнэнь ды лиятнень. Икеле молиця отраслякс кадовозь, Мордовиянь велень хозяйствась 19 пингень 2-це пельксстэнть лиякстомтсь паро ёнов: помещиктнень ды сюпав крестьянтнэнь хозяйствасост тевс нолодавсть важодемань одкстомтозь орудиятне, седе паро видьмекст, удобреният. Одкстомтовсть видневиця паксятне, кассь крестьянонь ды помещикень хозяйстватнень лезэвчист ды специализацияст. 1881-1902 иетнестэ кавксть седе ламоксть серой сюронь ды кой-косо ликшань видевкстнэнь киртязь, покшолгавтовсть модамаренть ды мушконть алов паксятне. Темниковань уездсэ 20 пингенть ушодовомантень модамарень кастомась ламолгадсь: крестьянонь хозяйстватнесэ – 29 раз, помещикень – вейксэксть; Спасской уездсэ 5 ды 44 раз. Товзюронь кастомась, васняяк, конась миевсь, 95 % вейсэндявсь Ардатовской уездсэ. 1913 иестэ технической культуратнень алов максовсть 72 тыщат десятинт (малав 8 %) соксевиця модат. Материально-технической юронть одкстомтоманзо ды кемекстамонзо, агротехниканть ды земледелиянь специализациянть паролгавтомаст пингстэ, 20 пингенть ушодовомантень зернань пурнамось весемезэ ламолгадсь 21 %, кассь крестьянонь хозяйстватнень лезэвчист. Ялатеке малав 55 % товарной кшись ульнесь сюпав крестьянтнэнь кедьсэ. Келейстэ виевгадозь, земледельческой производствась эзь максо крестьянтнэнь эрямост туртов сатышка ули-паро, секскак сындест ламонень савсь важодемс эрьва кодат промыслатнесэ ды сиведезь. 20 пингенть ушодовомантень Мордовиясо лововсть 250 ламо видэнь промыслат: чакшонь-мезень (8 велетнесэ), чувтонтень ды мушконь сэльгентень обработкань теемаь, рогожань кодамонь (23), парень анокстамонь (43), чарынь-крандазонь (148) ды лият.
1890-це иетнестэ промышленностенть виевгадомсто Россиясь аграрной масторстонть теевсь аграно-индустриальнойкс. Мордовиясь жо кадовкшнось ансяк аграрнойкс. Сонзэ социально-экономической положениянь лия ёнксось аштесь оштнень лавшочидест – ансяк 5 (Ардатов, Инсар, Краснослободск, Саранск, Темников), ды нетькак ульнесть аволь покшт. 1860-97 иетнестэ ошонь эрицятне ламолгадсть 6,4 тыща ломаньс ды лововсть 46 ламо тыщат, лиякс меремс 4 % весе эрицятнестэ, сестэ кода Россиясо среднейстэ малав 13 %. Мордовиянь оштнень хозяйстваст эзь виевгадо, ансяк Саранскоесь аламонь-аламонь теевсь торгово-промышленной центракс. 1867 иестэ сонзэ эйсэ эрясть 14,2 тыща, 1916 иестэ – 18 тыщат ломанть. Се шкань Мордовиянь оштне эзть тееве фабрично-заводской промышленностень центракс, кона икеле ладсо малав целанек кирдевсь велесэ. Седе икеле виев металлургической ды сукнань ортраслятне, эзизь цидярдо промышленной центрань предприятиятнень марто пелькстамонть, розорявсть. 19 пингень 70-це иетнень прядовомантень кадовкшность ансяк чугунонь солавтыця 6 заводт, 20 пингенть ушодовомантень – вейке. Сукнань кодамонь реформадо икелень 10 фабрикатнестэ 19 пингенть прядовомантень роботасть ансяк кавто. Теке жо шкастонть Ширингушской фабрикась, козо аравтовсь од оборудования, теевсь Мордовиясо икеле молиця каиталистической предприятиякс, 1895 иестэ тосо важодсть 4 тыщадо ламо робочейть ды иезэнзэ сукнадонть нолдавсь малав 800 тыщат целковоень питне. Кода икелеяк, Мордовиянь промышленностьсэнть сехте покш тарка занясть ярсамопелень анокстамонь отраслятне, сынст ютксто почтонь яжамонь предприятиятне. Кода ярсамопелень нолдамосояк, истя жо весе промышленностьсэнтькак, покш тарка сайсть винань анокстамось. 1911 иестэ сонзэ 26 предприятият ульнесть ансяк Краснослободскоень, Инсаронь, Саранскоень ды Наровчатонь уездтнэсэ, нолдасть продукция 8 миллионт 586 тыщат целковоень питне (84,6 % весе промышленной продукциястонть). 19 пингенть прядовомсто – 20 пингенть ушодовомсто бойкасто виевгадсь вирень промышленностесь. Сон малав целанек вейсэндявсь Спасской ды Темниковань уездтнэсэ, косо ламо виртнеде. Вирень промышленностенть бойкасто виевгавтомасо лездась Московско-Казанской чугункань кись, кува усковсь вирень производствань продукциясь. Самай те отраслясонть вейсэндявсть Мордовиянь торгово-промышленной буржуазиянь капиталтнэ. Ансяк Спасской уездсэ лововсть малав 200, Темниковань – 400 ламо вирень промышленникть, сындест сехте ламотне жо мокшонь ды эрзянь волостнесэ. 19 пингенть прядовомантень неть уездэнь вирень предприятиятнесэ важодсть вирень 3 850 керицят, уголиянь пултыцят, варонь пидицят, 2 740 ламо плотникть, пилицят ды лият. Кемекставсь Мордовиянь робочей классось. 1913 иестэ Мордовиясо роботасть 50 цензовой предприятият, косо важодсть 2 246 важодицят, куш покш промышленной предприятиятнень лезэст аволь покшоль: малав 2 % весе нолдавиця продукциястонть. Эрьва цензовой предприятиянтень среднейстэ савсть 44 важодицят. Ансяк 4 предприятиятнесэ ульнесть 100 ламо ломанть, 6 – 50 – 100, кадовикстнэ – 10-49 важодицят. Промышленностенть виевгавтомасо кодат-бути лиякстомат теевкшнесть Васенце мировой войнанть ушодовомсто. Военной заказтнэнь вельде келейгадсь производствась. Ламолгадсть важодицятне. 1916 иестэ транспортонть ды сырьянть а сатномаст марто сюлмавозь стакачитне пачтясть масторсонть промышленной ды велень хозяйствань производстванть киртямонтень. Ведьгеменде ламо процентт покш цёратнень войнав саемаст пингстэ лиссть стакачить важодицятнень а сатномаст марто.
Московско-Казанской чугункань кись лездась пек лиякстомтомс Мордовиянь экономической, общественно-политической, социально-культурной эрямонть. Рузаевка – Пенза, Рузаевка – Сызрань, Ромоданова – Н.Новгород линиятнень нолдамост марто Мордовиясо появась од отрасля, чугункань кинь транспорт ды чугункань кинь важодиця тев. Панжовсть од кить микшнеманть туртов. Бути икеле товартнэ суднатнесэ усксевсть Сура ды Мокша лейтнева, ней жо те тевесь киртявсь. Реформатне лиякстомтызь эрицятнень социальной ёнксост. Седе редявиксэкс теевсь нужачинь печтицятнень ды сюпавтнень ютксо а вейкетьксчись. Крестьянствась малав 60 % аштесь батрактнеде ды нужасо эрицятнеде, 12 % – велень буржуазиясь. Ошонь мещантнэде ульнесть весе эрицятнестэ 2,9 %, дворянтнэде – 0,4 %. Купецтнеде, сынст семиянь ломантнень марто вейсэ, ульнесть 1,1 тыща. Неявикс лиякстомат теевсть Мордовиянь духовной эрямосонть. Появасть мордавской интеллигенциянь васенце представительть, васняяк, неть ульнесть велесэ тонавтыцят. 1905 иестэ ушодызе эсь творческой кинзэ мокшонь-эрзянь литературань ушодыцятнестэ вейкесь – З.Ф.Дорофеев. 1906 иестэ яволявтсть эседест «Мужик» васенце газетань нолдыцясь В.В.Бажанов, скульпторось С.Д.Эрьзя, общественной деятелесь ды прозаикесь С.В.Аникин, тонавтыцясь Г.К.Ульянов. Капитализманть виевгадомань стака тевесь лангс ливтинзе ды домкалгавтынзе сюпавтнень ды нужасо эрицятнень ютксо аладямотнень. Реформань теемань весе шкастонть тешкставсть социальной аладямот. 1861-1900 иетнестэ крестьянтнэ кепсевсть сядо ниленьгеменксть, сынст ютксо ульнесть рузт, мокшот, эрзят, татарт. Революционной мельтнень кепедсть общественно-политической деятельтне П.Н.Горский, П.Г.Заичневский, Л.П.Никифоров, В.С.Серова ды лият. Рузонь васенце революциянть шкасто Мордовиясо ульнесть революционной кружокт ды эсерэнь ды РСДРП-нь первичной организацият, конат кеместэ сюлмавозельть Пензасо, Томбовсо, Н.Новгородсо, Симбирскойсэ, Московсо, Сызраньсэ ды лия оштнесэ эсест кондятнэнь марто. Мордовиянь велетнесэ ды оштнесэ сынь ветясть виев политико-просветительной ды организационной робота. Виев классовой бороцямонь таркакс Мордовиясь кармась улеме 1905-07 иень революциянть шкасто. Неть иетнестэ крестьянтнэ кепсевсть 250 ламоксть, конатнестэ 150 прядовсть лондавтоматнесэ-тапамотнесэ ды пултамотнесэ. 1905 иень ацамковсто Рузаевка станциясо чугункань кинь важодицятне, властенть саезь, яволявтызь «Рузаевской республиканть». 1905 иень ожоковонь 17-це чистэ Манифестэнть народонтень пачтязь, Мордовиясо теевсть эрьва кодат партият, козо совасть эсерэнь, социал-демократонь ды кадетэнь аволь покш организациятне. Кассь эрицятнень общественно-политической эрязачист 1-це Государственной Думас кочкамотнень шкасто, сонзэ депутатнэнь ютксо ульнесть Мордовиясто ломантькак. Классовой бороцямось одс виевгадсь 1-це мировой войнань иетнестэ. Сехте виевекс прянзо невтизе эсерэнь партитясь, самай сынь ды большевиктне мольсть инязоронть ды капиталистнэнь каршо 1917 иень февральской революциястонть.
1917 иень революциятне ды социальной аладямотне. Мордовиянь уездтнэсэ инязоронть ёртомадо кармасть содамо 1917 иень эйзюрковонь 1-2-це читнестэ. Те тевесь тешкставсь демонстрациятнесэ, митингтнесэ, общественной лувонть коламосо, мезесь лиснесь Саранскойсэ (эйзюрковонь 2-3-це читнестэ) ды лия уездной оштнесэ, тень пингстэ ульнесть тапамонь-лондавтомань ды властень представительтнень арестовамонь тевть. Эйзюрковсто ушодовсь Временной правительствань местной органтнэнь кемекстамост: теезь временной уездной исполнительной комитетт (эйзюрковонь 4-8-це читнестэ) ды аравтозь временной уездной комиссарт (эйзюрковонь 7-11-це читнестэ); нолдазь полициясь ды теезь милиция. Тердезельть крестьянонь ды земской уездной инекужот, косо кочкасть свалшкань исполнительной комитетт. Уездной центратнень коряс, Мордовиянь волостнесэ ды велетнесэ арасель тевтнень ветямонь виде лув, мезенть тешкстакшнызе Временной правительствась. Весе сословиянь волостной земстватнень организовамост сацтовсь сёксес, сынст тевест топавтсть крестьянской самоуправлениянь теевиця органтнэ, кода крестьянонь комитетнэ (эйзюрковсто) ды Советнэ (панжиковсто-умарьковсто), сынь кочкавсть волостень ды велень промкстнэсэ. Теке жо шкастонть Мордовиянь уездтнэсэ теевсь робочеень депутатонь Советт, солдатонь депутатонь Советт (эйзюрков-чадыков) ды крестьянонь депутатонь Советт (чадыковонть прядовомась – панжиковонть ушодовомась); седе тов Советнэс вейсэндявсть робочеень, солдатонь ды крестьянонь депутатнэ (чвадыков-медьков). Теевсть васенце профессиональной союзт, фабрично-заводской комитетт.
1917 иень Октябрьской революциясь топавтызе Россиянь обществанть вешеманзо, кемекстамс виев государственной власть, конань саты виезэ идемс ламо национальностень масторонть экономической, военной ды национальной кажодонть. Росиянь раськетне сизесть стакачитнеде ды 1-це мировой войнань кажотнеде, Временной правительстванть лавшочидензэ, седеяк покш нужачисэ эрямодонть.
Тевтнень лиякстомтызь Пензасо, Тамбовсо, Симбирскойсэ ды Н.Новгородсо революционной вийтне, конат свал кирдсть сюлмт Петроградонть ды Московонть марто. Сеедьстэ мордовской уездтнэс сакшность аволь ансяк эрьва кодат директиват, мик пек а вейкеть установкаткак, конат аволь лездасть, ансяк мешасть роботантень. Тенень пачтясь се, што революциясь теевсь ламо партиянь условиятнесэ. Истямо стакачитнесэ кемекставсь Советэнь властесь (1917 иень ожоковось – 1918 иень чадыковось), кой -кона уездтнэсэ ды волостнесэ сынь кемекставсть вооруженной бороцямосонть. Пролетариатонь диктатуранть яволявтомань, кемекстамонь ды юридическойстэ сёрмадомань шкатне аволь свал ульнесть вейкеть.
Мордовиянь уездэнь центратнесэ советской властенть кемекстамозо
| Уездэнь центрась |
Тевтнень мельга-мельцек молемась |
| Яволявтомась |
Кемекстамось |
Юридической сёрмадомась |
| Ардатов |
1917 иень сундерьковонь 19-це чи |
1918 иень эйзюрковсто |
1918 иень эйзюрковсто |
| Инсар |
1917 иень ацамковсто |
1918 иень якшамковонь 28-це чистэ |
1918 иень якшамковонь 28-це чистэ |
| Краснослободск |
1918 иень якшамковонь 31-це чистэ саезь даволковонь 2-це чис |
1918 иень якшамковонь 31-це чистэ саезь даволковонь 2-це чис |
1918 иень якшамковонь 31-це чистэ саезь даволковонь 2-це чис |
| Рузаевка |
1917 иень ожоковонь 30-це чистэ |
1917 иень ожоковонь 30-це чистэ |
1917 иень ожоковонь 30-це чистэ |
| Саранск |
1918 иень якшамковонь 11-це чистэ |
1918 иень якшамковсто |
1918 иень даволковонь 2-це чистэ |
| Темников |
1918 иень якшамковонь 23-24-це читнестэ |
1918 иень эйзюрковсто |
1918 иень эйзюрковонь 14-це чистэ |
Волостной Советнэнь теемась лиясто пачтясь уездэнь центратнесэ советской властенть кемекстамонтень, ялатеке волостнесэ ды велетнесэ сехте ламо советской органтнэ теезельть 1918 иень эйзюрковсто, ды, кода свал, депутатнэ ульнесть велень сюпав ломанть.
Советской властень васенце читнестсэ саезь Мордовиясо кемекставсь кавксо часонь перть важодема чись, тевс нолдавсь тейтерь-атнень ды эйкакштнэнь трудост ванстомась, сэредемадонть страховамось, питнень апак пандо тонавтнемась ды медицинской лезксэнь максомась.
«Военной коммунизмась» ды гражданской войнась (1918-21). 1918 иень тунда-кизна Мордовиясо, кода целанек Россиясояк, теевсь «военной коммунизмань» политикась, козо совавтовсть зярыя экономической, политической ды социальной тевть-кирдат. Бойкасто национализировавсть промышленной предприятиятне (1918), козо совавтовсть аволь цензовой производстваськак, теезь народной хозяйствань Советт, лоткавтовсь башка ломантнень ёндо микшнемась, ошонть ды веленть ютксо товаронь полавтнемась, саезь помещикень имениятне ды кеме азортнэнь ули-парост, крестьянтнэнь ютксо вейкетьстэ явшевсь модась ды седе тов. Советской властень 1-це иетнестэ аграрной политиканть ветямсто крестьянствантень максозь малав 210 тыщат десятинт помещикень, удельной, государственной модат. Властесь кемекстась модасонть вейсэнь пользовамонь эрьва кодат ёнкст – велень хозяйствань артельть, велень хозяйствань коммунат, моданть вейсэ соксеманзо-виднеманзо коряс товариществат, колхозт, совхозт. Ялатеке вейсэнь васенце хозяйстватнень теемась ульнесь лезэвтемекс, ды велесэ тевтне яла беряньгадсть; середняктне, сюпав крестьянтнэ ды кулактне од тевтнень сялдсть, беднойтнень ютксо виевгадсь вачочись, мезесь ушодовсь эште 1-це мировой войнанть шкасто. Оштнесэ, сехте пек прятоштнесэ ды промышленной покш центратнесэ ярсамопельтнень а сатномаст кувалма, 1918 иень тунда Россиясо эрямос ютавтовсь продовольственной диктатурась, мезенть топавтсть солдатнэстэ ды робочейтнестэ продовольственной отрядтнэ, конань кучнесть велетнес лишной кшинть саеме. 1918 иенть прядовомантень тесэ лововсть 3 ламо тыщат продотрядовецт, конат роботасть властенть теевть чрезвычайной органтнэнь (ревкомтнень, чрезвычайной комиссиятнень, ВОХО-тнень, ЧОН-тнэнь) ды бедноень комитетнэнь марто (умарьков-таштамков). Бедноень комитетнэ теевсть велесэ властень органокс, сеедьстэ нолдтнесть покш колавкст. Продотрядтнэнь ды бедноень комитетнэнь казямо тевест теевсть тувталокс крестьянтнэнь кепедевемаст туртов, мезенть печтясь Советской Республикась 1918 иень тунда ды кизна. Крестьянонь восстаният ульнесть Покш Азясь, Яковщина, Баранчеевка, Лада, Пятина, Гумны, Ташто Синдрова ды лия велетнесэ.
Мордовиянь уездтнэсэ экономикась пек лавшомсь 1919 иестэ продовольственной развёрстканть эрямос ютавтоманзо пингстэ. 1918-21 иетнестэ продразвёрсткань коряс Мордовиясо пурназель малав 10 миллионт пондт кши.
1918 иень тунда ушодовсь 1918-20 иень гражданской войнась. Мордовиянь уездтнэ «военной коммунизмань» шкастонть кавксть (1918 ды 1919) ульнесть фронтонть маласо линиякс. Восточной фронтонь малавикс тылэкс; тесэ кирдесть РККА-нь покш вооруженной вийть (вантано «Воинской частне»). Зярдо 1918 иень панжиковонть прядовомсто Чехословацкой корпусось кепедсь мятеж (вантано «Чехословацкой корпусонь мятежесь»), в осстаниясь васенцекс ульнесь Пензасо, ков контрреволюциянть лепштямо кучовсть 660 боецт Саранскойстэ ды Рузаевкасто. 1918 иенть прядовомсто явновозь подразделениятнестэ, конат воевасть Симбирск – Сызрань – Самара ёнкссонть, теезель Восточной фронтонь Васенце армиясь (командующеесь М.Н.Тухачевский; политкомтне В.В.Куйбышев, О.Ю.Калнынь). Рузаевка станциядонть аволь васоло Пайгарма велесэ ульнесь 1-це Восточной армиянь штабось. 1918 иень умарьковонь 15-це чистэ Саранскойсэ теезель мобилизационной отдел, кона местной эрицятнесэ кемекстызе Комсь нилееце Самаро-Симбирской Кшнинь стрелковой двизиянть, Кеветееце стрелковой дивизиянть ды Пензань комсеце стрелковой дивизиянть. 1918 иень ожоковсто ушодовсь Саранскоень васенце советской стрелковой полконть кемекстамось, кона тюрсь ашотнень каршо Восточной, мейле жо Южной фронтнэсэ. 1919 иень чадыковсто-панжиковсто Саранскойсэ ульнесь Башкирской ревкомось, кона кемекстызе Башкирской дивизиянть, 1918-20 иетнестэ мокшонь-эрзянь таркатнесэ ульнесть РККА-нь ламо интернациональной воинской соединеният.
Весемезэ армияв тердезельть малав 74 тыщат ломанть (1918 иестэ – малав 35 тыщат, 1919 иестэ – 25 тыщат, 1920 – 14 тыщат). Тосонь органтнэ ды трудицятне весемесэ лездасть армиянтень ярсамопелень, конницантень фуражонь максомасо. Ялатеке «военной коммунизмань» казямо политикась, сехте пек продразвёрсткась, кармавтынзе каршо кепедевеме рузонь, мокшонь, эрзянь ды татаронь крестьянтнэнь. 1919 иень восстаниятне мокшонь ды эрзянь модатнень лангсо сехте покшт, сынст эйс совасть эрицятне. Крестьянонсетнень марто вейсэ ульнесть каршо молемат воинской частнесэяк, тень тейнесть сеть, кинь арасель мелезэ воевамс. Ансяк 1919 иень медьковсто-умарьковсто Инсаронь, Краснослободскоень, Рузаевкань, Саранскоень ды Наровчатонь уездтнэсэ кемекставсть 7 096 дезертирт, Темниковань уездсэ – 6 004, 1920 иентень мокшонь-эрзянь таркатнесэ дезертирствась теевсь «пиже движеникс». Весемезэ жо 1918-20 иетнестэ Поволжьясо ульнесть 200 ламо крестьянонь восстаният. «Военной коммунизмань» политикань итогокс, гражданской войнасонть советской властень изнявксонть ды омбо масторсто кайсевицятнень тапамост марто вейсэ, масторонь ды мокшонь-эрзянь таркатнень экономикась печтясь покш стакачить: киртявсь промышленной производствась, эрьва косо аламолгадсть видневиця паксятне, крестьянстванть вейкендямось ды сонзэ ансяк эсензэ кастовтонть лангсо эрямось, финансовой системанть лавшомгадомась, ярмактнень вишкалгавтомась, налогонь политиканть колавомась, демократиянть лоткавтомась ды чрезвычайной тевтнень келейгавтомась, социально-психологической апаро ёнксонть кастомась, мезесь невтевсь од властенть тевензэ сялдомасо ды лиякстоматнень эрявиксчидест пачтямосонть.
Экономикасо од политикась (1921 – 1920-це иень 2-це пельксэсь). 1921 иестэ ушодовсь экономикасо од политикань шкась (НЭП-сь), конань башка ёнкстнэ крайсэнть неявсть уш 1920 иенть прядовомсто (кой-кона административной единицатнесэ кшинь монополиянть полавтомась, вишкине промышленностенть башка ломантненень максомась ды седе тов). Сэтьместэ эрямонь шкась тешкставсь стакачитнесэ, мезесь ульнесь политикасо, экономикасо, социальной тевтнесэ, финанстнэсэ, транспортсо ды седе тов. Советской властенть сехте пек тандавтомакс ульнесь А.С.Антоновонь прявтсо крестьянонь восстаниясь (1920-21). Темниковань ды Краснослободскоень уездтнэсэ яволявтовсь военной положения, теезельть революционной комитетт. Эрямонь лувось колавкшнось Ардатовань, Карсунской, Саранскоень, Инсаронь ды Спасской уездтнэсэ. 1921 иень эйзюрковсто РКП(б)-нь 10-це инекужось примась решения полавтомс продразвёрстканть продовольственной налогсо, «военной коммунизмань» политикастонть НЭП-нтень ютамодо. Ушодовсь экономиканть кемекстамозо: киртявсть хозяйстватне, косо эзть видневе эли аламо видневсть модатне. Панжовсть видницянь комитетт, машинно-прокатной станцият, эрицятненень максовсть видьмекст. Теке жо шкастонть максовсь лезкс вейсэнь хозяйстватненень. Меревсь виевгавтомс кустарной ды вишкине промышленностенть кода башка ломанень ды кооперативной предприятиятнень, сынст эйсэ тевтне ветявсть местной СНХ-нень вельде, конат макстнесть производственной заданият арендань организациятненень (Саранскоень, Рузаевкань, Инсаронь уездтнэсэ, косо 1922 иестэ 29 цензовой промышленной предприятиятнестэ одс вельмевтезь ды важодсть 12). Кепедевсь Ладской ГЭС-сь (ГОЭЛРО-нь планонть лувсо). Социальной тевтнесэ весемесь теевсь сёрмас а содамонть витемантень, эрицятненень медицинской лезксэнь максоманть паролгавтомантень ды седе тов. 1921-22 иетнестэ Поволжьянь, Дононь, Северной Кавказонь ды Украинань кшинь кастыця 25 губерниятнесэ овсе арасельть пизементь ды ушодовсь вачочись (вантано «Вачочи»), мезенть пингстэ виевгадсь тифсэ, маляриясо ды лия ормасо сэредемась. Вачочинть каршо бороцямо тердезельть весе учреждениятне, предприятиятне, кооперативтне, профсоюзонь, од ломанень организациятне, РККА-сь. Теезель вачачинь печтицятненень лездамонь Центральной комиссия (Помгол). Вачочинь печтиця районтнэс апак лотксе мольсть ярсмамопель, надобия марто эшелонтнэ. Вачочись изнязель, ялатеке пек лавшомтызе краень экономиканть, сонзэ производительной вийтнень. 1928 иестэ велень хозяйстванть кепедемась прядозель, Мордовиянь уездтнэ 1926 иестэ саезь уш велень хозяйствань эрьва кодамо продукциянь нолдамонь коряс Средне-Волжской регионсонть лиссть икелев. 1928 иестэ 1913 иенть коряс видневиця паксятнеде ульнесть 111 %, ракшатнеде жо 1916 иенть коряс – 135 %. Теке марто вейсэ тонавтницятне тешкстыть хозяйстватнесэ техниканть а сатноманзо. Велень хозяйстванть коряс, промышленностесь кепедевсь седе састо ды аволь вейкетьстэ, фабрично-заводской промышленностьстэнть бойкасто паневсь частной капиталось. Промышленностенть виевгавтомань войнадо икелень (1913) покшолмась истят показательтнень коряс, кода весемезэ нолдазь продукциясь, предприятиятнень, важодицятнень ламочись, 1920-це иетнень прядовомантень эзь добоваво, ансяк вирень промышленностеденть башка. Сехте пек виевгадсь вишкине ды кустарной производствась. Тевтеме аштеманть кувалма ламот предприятиятне пекставсть (Зубова-Полянань чугунонь солавтомань ды вирень пилямонь заводтнэ, Сивининь кшнинь деталень заводось, Темниковань фаянсонь фабрикась, Саранскоень вирень пилямонь 2 заводтнэ ды седе тов). Лисни НЭП-нть тевс нолдамось пек седе кепедизе мокшонь-эрзянь масторонь экономиканть.
Общественной од строенть кемекстамось ды виевгавтомась (1920-це иетнень прядовомась – 30-це иетне). Мордовской национальной государственностенть теемась. Мордовиянть социально-экономической виевгавтомасо покш таликазо мордовской государственностенть тееманзо. 1928 иестэ теезь Мордовской округ. 1930 – Мордовской автономной область, 1934 – Мордовской Автономной Советской Социалистической Республика. Эште 1920-це иетнень прядовомсто пек седе виевгадсь кооперациясь (потребительской, велень хозяйствань, кредитэнь ды производствань). МО-нь крестьянонь хозяйствась 1929 иестэ 52,2 % ульнесь кооперативной. Велень хозяйствасо коллективизациясь ушодовсь 1929 иень октябрясто, топавтовсь зярыя этапсо, прядовсь 1940 иестэ. Сон сюлмавсь кулактнень истожамост ды панемаст марто. Индустриализациядонть икеле лиякстомтовсь фабрикань-заводонь промышленностьсэнть тевтнень ветямось, ялатеке совнархозтнэнь пекстамось ды 1932 иестэ башка отраслятнева тевень ветямонтень ютамось эзть кандо эрявикс лезэ, эдь властень местной органтнэ явозельть цензовой предприятиятнесэ тевень ветямодонть. 1930-це иетнень ушодовомсто хозяйстванть планировамосо сехте покш мель явовсь покш промышленностень кепедемантень, седе ламо ярмакт кармасть явовомо промышленностентень. 1930 иестэ Мордовиянь промышленностесь свал эзь топавтне экономиканть виевгавтомань вете ды эрьва иень плантнэнь, лия ёндо – добовавсть изнявкст отраслевой структуранть лиякстомасо, производстванть бойкасто кастомасо ды ламолгавтомасо. Од строительстванть марто вейсэ одкстомтовсть ды келейгавтовсть ташто предприятиятне. Кепедезельть: Саранскойсэ – консервной комбинатось, котонинной фабрикась, пенькокомбинатось, Саровсо машиностроительной заводось. Теевсть промышленностень од отраслят: химической, стройматериалонь, пенькоджутовой ды лият. 1920-це иетнень прядовомсто – 30-це иетнень ушодовомсто Мордовиянь экономикасонть кармась виевстэ тевс нолдавомо тюрьмасо аштицятнень важодеме вийсэ кармавтомась. Се шкастонть масторсонть уликс 12 покш исправительно-трудовой лагерьтнестэ кавтотне кирдевсть Мордовиясо. Сынст хозяйственной тевекс ульнесь вирень анокстамось, вирень пилямось ды чугункань кинь кепедемась. Гулагонь 1931 иень панжиковонь 25-це чинь кармавтоманть лувсо теезель Темлагось, 1948 иестэ саезь – «Дубравлагось», косо 1931 иестэ кирдевсть 75 пекстазь ломанть, 1930-це иетнестэ сонзэ 15 отделениятнесэ – 32 тыщат ломанть. Лагерть панжозельть Молочница, Сосновка, Ударный, Барашева, Явас поселкатнесэ. 1930-це иестэ пансематне теевсть Мордовиянь историясонть сехте кажов шкакс, токизь экономиканть, культуранть, науканть, искусстванть, тевень ветямонь аппаратонть. МР-нь Прокуратурань даннойтнень коряс, республикасонть закононь колазь политической пансематнень печтизь 9 310 эрицят (8 030 церат, 1 280 тейтерь-ават), сындест 5 625 – крестьянт, 873 – робочейть, 649 – служащейть (предприятиянь 176 прявтт) 651 – озномань тевентень служицят, 1 100 – политзаключейннойть, 410 – лия ломанть. 2 972 ломантнень коряс тевс нолдазельть судонь органтнэ, 6 338 – аволь судонь, 1 177 ломанть ледезельть, 8 133 ломантнень коряс тевс нолдавсть чумондомань лия ёнкстнэ. Экономиканть туртов аволь уш истя пек кажовокс, ялатеке общественно-политической виевгадогманть туртов седе стакакс теевсь эрицятнень избирательной праваст саемась (кой-кона даннойтнень коряс, 15-20 %). Кармавтомань-лепштямонь системанть пингстэ редявсь, кодамо зыян канды тевтнень ветиця эрьва кодамо аппаратонь ламо важодицятнень ёмавтомась, мезенть пингстэ теевсь административно-кармавтомань од система.
1940-це иетнень ушодовомсто Мордовиясь теевсь аграрно-индустриальной республикакс. Зерновой культуратнень весемезэ пурнамось 1929 иенть коряс покшолгадсь 2 ламоксть, государствантень зернань миемась – 4 ламоксть: 3,7 миллион пондтнэнь таркас миезь 15,5 миллион пондт зерна. Ялатеке састо ламолгадсть МТС-тнэ (вантано «Машинно-тракторной станциятне»), праксянь ламо тевтне топавтовсть кедьвийсэ (зерновойтне комбайнасо весемезэ урядавсть ансяк 16,7 %), алкинекс кадновсь колхозтнэсэ трудонть ладямось, урожайностесь ды животноводствань продуктивностесь. Мордовиянь промышленностьсэнть 1940 иентень роботасть 273 покш предприятият, косо важодсть 24 тыщадо ламо ломанть. Войнадо икелень итнестэ Мордовиясо малав целанек прядовсь робочей классонть кемекстамось. 1939 иестэ предприятиятне 1913 иенть коряс, ламолгадсть малав ветексть, робочейтне – 6 ламоксть (15 тыщадо ламо), весемезэ нолдазь продукциясь –кевейкеексть (малав 100 миллионт целковоень питне); теевсть машиностроительной ды металлообрабатывающей отраслятне, шождыне индустриясь; седе тов ламолгадсть профессионально-технической курстнэ ды техминимумонь кружоктне, бойкалгавтовсь ёроков важодицянь анокстамось. Мордовиясь ульнесь Поволжьясо сехте ламо котонинэнь, пиксэнь ды карьксэнь нолдыцятнестэ вейкекс; виевгадсть коцтонь кодамонь, ярсамопелень нолдамонь, переработкань, вирень анокстамонь ды деревообрабатывающей промышленностесь. Келейстэ мольсь культурной строительствась. Добовавсть изнявкст эрицятнень сёрмас а содамост витемасо, эрямос ютавтовсь весенень начальной образованиянь максомась, теезь эскелькс весенень 7-иень образованиянь максомантень. Теевсть паро лиякстомат национальной школанть, мокшонь ды эрзянь литературанть виевгавтомасо. Панжовкшнось мокшонь ды эрзянь раськень историясонть драмань васенце национальной театрась.
Мордовиясь Ине Отечественной войнань иетнестэ (1941-45). Ине Отечественной войнась ульнесь минек масторонь раськетнень историясо авль ансяк драматической, истя жо героической шкакс. Братской лия народтнэнь марто вейсэ гитлеровской Германиянть тапамонтень лезкс кандсть Мордовиясто цёратне ды тейтертне. Военкоматнэстэ тердематнень апак учне, коммунистнэ, комсомолецтнэ, аволь партийной ломантне мольсть тердемань пунктнэс энялдома марто – кучомс сынст фронтов. Войнань васенце 2 ковтнестэ эсь олясо фронтов тусть 6 тыщадо ламо ломанть, сынст ютксо 4 тыщадо ламо коммунистт (2,5 иес – малав 8,5 тыща). Фронтонть маласо улезь, Мордовиясь 1943 иень ожоковонть куншкавидс совась Московской военной округонтень. Республикасонть анокстасть сокссо ардтницянь, танконь истожицянь, ятонть тылсэ, партизанонь отрядтнэсэ салавонь тевтнень ветямост туртов специалистэнь формированият. Тесэ примсесть ды кемекстасть воинской частть, анокстасть пантизантнэнень эрямо таркат Зубова-Полянань ды Темниковань ёнксонь виртнесэ. МАССР-сэ кирдевсть морской авиациянь, химической вачкотьксэнь кандомань 29, 85, 94 ды 95-це башка бюатальононь, связень 178-це башка батальононь воинской частне ды седе тов. Соксонь 112-це батальонось тюрсь Московонть маласо. 326-це Рославльской стрелковой дивизиясь, кона кемекставсь Мордовиясо, эсь боевой кинзэ ушодызе Московонть маласто, прядызе Эльбань беректнесэ. Мордовиянь ламот цёратне тюрсть 91-це гвардейской Духовщинской стрелковой дивизиянь частнесэ.Мордовиянь 100 тыщат эрицят тердезельть Московонь ды областень Сурской оборонительной рубеженть строямо. Мордовиясь примсесь боевой самолётнэнь специальна анокстазь аэродромтнесэ. Республикась теевсь Средней Поволжьясо ранявозтнень пичксевтемаст коряс центратнестэ вейкекс: тесэ ульнесть 14 госпитальть. Сындест 6 – Саранскойсэ. Мордовиянь производственной площадтнесэ аравтнезель Украинань, Белоруссиянь, Брянской, Курской, Орловской областень ды масторонь лия таркатнестэ 17 предприятиянь оборудования. 1941 иень сёксня сындест ламот ушодсть нолдамо продукция фронтонть туртов, 1942 иенть куншкавидстэ жо важодсть весе вийсэ. Республикань промышленностенть роботазо военной лувсо кармась ветявомо 1942 иенть ушодовомсто, седе икеле, целанек масторонть коряс (1942 иень куншкавидэсь), эдь те эзь веше технологической процессэнть покш лиякстомат. Мордовиясо Саранской механической заводонть ды «Электровыпрямитель» заводонть панжомаст марто путозь юр войнадо мейле покш промышленностенть виевгавтоманзо ды сонзэ национальной кадратнень кемекстамост туртов. Васенцесь нолдась взрывательть снарядтнэнь туртов, омбоцесь – выпрямительной агрегатт, конат эрявсть армиясо, ВМФ-сэ, народной хозяйствасо. Оборонной (военной) промышленностентень кандови Саровской заводоськак, кона нолды артиллерийской снардт. Республикасонть виевгадсь промысловой кооперациясь, вельмевтезь коекс теевиця промыслатне, конат, васняяк, сюлмавозь тейтерь-аватнень важодемаст марто. Виевгадсь стамонь, сукнань кодамонь, меховой, кемень кевердемань производстватне, пищевой промышленностень башка отраслятне.
Мордовиясь примась ятонть саевть таркатнестэ малав 80 тыщат сыцят, сындест 25 тыщат эйкакшт, кинень ульнесть 15 а седе ламо иеть. Эйдень кужонь ды пионерской лагерень, фронтонь ды фронтонть маласо таркатнестэ ускозь колмо тыщадо ламо эйкакштнэнь кирдемаст туртов панжозельть эйдень 26 кудот ды интернетт. Войнань васенце ковтнестэ республикань эрицятне трямс-кастомс сайсть 1 300 ламо эйкакшт. Мордовиясь лездась сеть территориятненень, конань саекшнизь фашистнэ. 1942-43 иетнестэ Смоленской, Орловской, Рязанской, Тульской областненень максозельть малав 4 тыщат лишметь, 3 тыщат тувот, 10 тыщат скалт; максозь лезкс Ленинградонтень, 1944 иестэ саезь эрьва районось лездась Гомельской областень вейке районнэнь, конат олякстомтовсть ятодонть.
Войнань шкастонть шабрань Башкирясо, Удмуртиясо, Татариясо, Ульяновской, Куйбышевской олбластнесэ робочейтне ламолгадсть, Мордовиясо жо сынь аламолгадсть 95,6 тыща ломаньстэ 83,4 тыщас. Войнанть прядовомантень республикань народной хозяйствасо тейтерь-авань трудось лововсь 67,5 % (СССР-сэ – 55 %), промышленной робочейтнень ютксо жо – малав 70 %, весе важодицятнестэ 155,2 % ульнесть од ломанть, кинень эзть топодекшне 18 иеть. Войнань иетнестэ 100 ламо тыщат ломанть казезь «За доблестный труд в Великой Отечественной войне 1941-1945 гг.» медальсэ. Те шкастонть коммунистэнь Мордовской областной партийной организацияс совасть 12 тыщадо ломо ломанть, сынст ютксто партиянь членкс 7 тыщат кандидатт. Сонзэ рядтнэсэ интеллигенциясь ды служащейтне 1941 иень 35 % 1945 иестэ ламолгадсть 47 %. Весемезэ Ине Отчественной войнань фронтнэсэ тюрсть Мордовской областной партийной организациянь весе коммунистнеде малав кавто колмоцекс пельксэсь ды 41 тыща комсомолецт. Мордовиясто фронтов тусть эрьва кодамо национальностень 240 тыщадо ламо ломанть. Сындест пеледест ламот чавовсть. Тыщат боецт – Мордовиянь цёрат тейсть героической подвигть: Брестской крепостенть, Московонть ды Ленинградонть ванстомсто, Севастополенть олякстомтомсто, Сталинградонть ало ды Курской чирькесэнть, Украинань стептнесэ ды Белоруссиянь виртнесэ тюремстэ. Малав 100 тыщат боецт ды командирт казезь орденсэ ды медальсэ. Мордовиясо Советской Союзонь 104 геройть, 255 ломанть Славань колмонест степенень орденэнь кавалерт.
Аграрно-индустриальной экономикастонть индустриально-аграрноентень (1945-65). Фашистской Германиянть каршо войнась кандсь покш зыян масторонь народной хозяйствантень. Сонзэ стакачитне печтявсть Мордовиясояк. Войнастонть ёмавтозь 131 тыща ломанть. Сехте покш стакачить печтясь велесь. Малав весе важодиця эрицятне тердезельть фронтов. Кадовкшность ават, сыре ломанть ды эйкакшт. Важодеме маштовицятне 1940 иенть прядовомань 342 тыщат ломантнестэ 1945 иестэ аламолгадсть 208 тыщат ломаньс. Колхозтнэ кадовкшность автомашинавтомо. Трактортнэнь, комбайнатнень ды велень хозяйствань лия техниканть а сатномась кирдсь тунда праксянь роботатнень ды урожаень урядамонть. Пек киртявсть видневиця паксятне, вишкалгадсь велень хозяйствань культурань урожаесь, аламолгадсть ракшатне. 1945 иестэ лововсть 1 623 колхозт, сындест 1 000 ламот ульнесть кадновицякс. Войнадо мейлень стакачитнестэ вейкекс кадовкшнось эвакуированнойтнень туемась. Войнань иетнестэ республикас састь 80 тыщадо ламо экакуированнойть (тейтерь-ават, сыре ломанть ды эйкакшт). Малав 11 тыща састь Московсто, Ленинградсто ды областнестэ. Сынь неявиксстэ ламолгавтызь Мордовиянь важодицятнень, васняяк, велетнесэ. Сыцятнень одс туемась, мезесь ушодовкшнось 1943 иестэ, мольсь кода понгсь, 1945 иентень теевсь массовойкс ды парсте ладязь, 1946 иень тундонтень прядовкшнось. Мордовиято мекев туемась ютась сэтьместэ, масторонь кой-кона лия таркатнесэ жо (Урал, Казань) ульнесть робочейтнень кепсевемат, кинь тосонь властне санртнесть кадомс эвакуировазь заводтнэс. Мордовиясо тевтне мольсть лия лувсо. 1941 иестэ эвакуировазекс пряст евтазь, Архангельской ды Мурманской областнестэ Мордовияв велявтсть малав 3 700 цёрат, тейтерь-ават ды эйкакшт, кить 1930-це иетнестэ кучовкшность Пелеве ёнов. 1945 иенть прядовомантень весе сынь вийсэ ильтязельть мекев, тенст путозь эрямо таркатнес. Войнастонть сэтьме эрямонтень ютамонь тевесь, мезесь аравтовкшнось эрьвань икелев, сехте пек токшесь войнасто велявтыцятнень. Сындест васенцетне Мордовиясо появасть 1945 иень панжиковонть прядовомсто – аштемковонть ушодовомсто, умарьковсто велявтсть 6 тыщадо ламо ломанть, 1946 иень якшамковсто – 31 тыщадо ламо, эйзюрковсто – малав 34 тыщат. Сынст ютксо ульнесть ават ды тейтерть. 1946 иень ожоковонь 1-це чинтень Мордовиянь 3 200 ламо цёрат велявтсть кудов полонсто, малав пелест печтизь тов понгомань тувталтнэнь ванкшноманть. 1946 иень тундось Мордовиясо ульнесь пек коське. Малав 100 тыщат гектартнэнь лангсо видевкстэ лиссть ансяк аштемковсто, целанек ёмасть 48 тыщат озимтне. Кадовикс паксятнень урожаесь ульнесь гектарстонть 4 центнерт. Колхозтнэнень ды совхозтнэнень эрявсь государствантень миемс урожаень 52 %. Штобу топавтомс планонть, саевсь видьмексэкс ды кшикс зернась, тень юткс совавтовсь сеяк, кона кадовкшнось колхозниктненень явомс. Зернась тусь ярсамопелень таштамс ды омбо масторов миемс. Зернась аламолгадсь 1,7 раз. Тень пингстэ кшиденть кармасть панеме колмоксть седе аламо, 1940 иенть коряс. Мордовиясь ушодсь вачачинь печтямо. Оштнесэ ды робочеень поселкатнесэ карточной системась сонзэ аламодо шождалгавтызе. 1947 иень умарьковонтень лововсть 76 тыщадо ламо вачодо эрицят ды теде ормалгадыцят. Ярсамопелекс наксадо зернанть ды модамаренть ютавтомсто, ушодовсь ломантнень морявомась. Пек ламолгадсть кулыцятне. Мордовиянь СНК-нть ды ВКП (б)-нь ОК-нть кармавтомаст коряс, республикасонть бойкасто кармасть панжтнеме паксясо телень перть кирдевиця зернанть паро лангс полавтомань пункт. Велесэ тевтне кармасть паролгадомо. 1947 иень ацамковсто ютавтовсь ярмаконь реформа, кона, асатыкстнэнь лангс апак вано, лездась кемекстамс масторсонть ярмактнень марто сюлмавозь тевтнень. Теке жо шкастонть киртявсть питнетне, лоткавтозельть карточкатне. Ялатеке ярсамопельтне ды промышленной товартнэ эзть сатно, эзь тееве товаронь сатышка таштавкст. Васенце читнестэ ды ковтнестэ ломантне вастовсть сехте пек эрявикс товартнэнь: кшинть, оенть, сахаронть ды лиянть-мезенть а сатномаст марто, тень пингстэ кармась теевеме нормань коряс максомань ситстемась. Войнадо мейлень иетнестэ Мордовиянь промышленностьсэнть малав целанек одкстомтовсь станоконь паркось. Целанек лиякстомтовсь производствань технологиясь. Промышленностенть виевгадомань башка ёнкстнэ аштесть сень эйстэ, эдь ташто предприятиятнень одкстомтомаст ды келейгавтомаст марто вейсэ, ушодовсь одтнэнь: инструментальной, кабельной, цементной, электроламповой ды лия заводтнэнь кепедемась, мезес союзной фондстонть явовсть 500 миллионт целковойть. Промышленностьсэ весемезэ нолдазь продукциясь, 1940 иенть коряс, 1950 иестэ ламолгадсь малав 20 %. Тень лангс апак вано тешкставсь промышленной производстванть киртямозо. Седе стакасто тевтне мольсть республикань велень хозяйствасо. 1950 иенть прядовомантень 1 652 вишкине хозяйстватнестэ теезь 910 покшт, 1959 иестэ сындест кармасть улеме 707, 1962 иестэ – 661. Колхозтнэнь покшолгадомась, вейке ёндо, лездась седе парсте тевс нолдамс моданть, техниканть, робочеень виенть, киртямс аволь производствас ютавтовиця ярмактнень ды седе тов, лия ёндо – те эзь вечкеве виев хозяйствань крестьянтнэнень, эдь моданть кадызь азортомо, колызь велетнень инфраструктураст, вейсэндизь лия хозяйстватненень. Ютавтовсть велень хозяйстванть кепедемень лия тевтькак. Пек лездась республикав сортовой видьмексэнь, удобрениянь, горючеень, запасной пельксэнь ды техникань ускомась. Весе те пек киртизе кедьвийсэ важодеманть, кастызе трудонь производительностенть, лездась бойкалгавтомс велень хозяйстванть виевгавтоманзо. Народной хозяйстванть кемекстамонзо марто вейсэ топавтовсть эрямонь социальной ёнкстнэяк. Виевгадсь эрямо кудонь кепедемась: 1946-50 иетнестэ максозь 57 тыщадо ламо м2 кудот, велетнесэ строязь 20 тыщат кудот. Вишкалгавтовсть питнетне сехте пек эрявикс товартнэнь лангс (1946 иенть коряс, 1952 иестэ – 1,9 раз). 1957 иень аштемковсто теезь Мордовской экономической административной район Совнархозонть марто вейсэ. Сонензэ максозь 71 промышленной предприятия ды 3 строительной покш организацият. Ушодовсь химической ды светотехнической, литейной промышленностень комплексэнть аравтнемась, строямонь базанть келейгавтомась (Ковылкинасо силикатной кирьпецень ды Комсомольский робочей поселкасо шиферэнь заводтнэ), приборостроительной заводонь строямось, одкстомтовсть кабельной, инструментальной ды лия заводтнэ. Тевс нолдазь 2 № Саранскоень ТЭЦ-нь 1-це турбинась, автосамосвалонь заводонь цехесь, макарононь ды мебелень фабрикатне. 1950-це иетне – 60-це иетнень ушодовомась ловови неень шкань экономиканть виевгадомань сехте паро шкакс. Ванкшносынек экономиканть касомань лувонть – 6,6 % 50-це иетнестэ ды 5,3 % 1960-це иетнень ушодовомсто. 1959-65-це иетнестэ Мордовиянь индустриянть виевгавтомань паро тевекс ульнесь республиканть аграрно-индустриальнойстэ индустриально-аграрнойкс теемась. Семилетканть прядовомантень весемезэ промышленной продукциянь нолдамось 1958 иень 47 % 1965 иестэ ламолгадсь 70 %. 1965 иестэ Мордовиянь велень хозяйствасо ульнесть 12,3 тыща тракторт. 1965 иентень электричества ветязь весе колхозтнэс, животноводствасо жо механизациясь кадновсь лавшокс. Весемезэ пурназь зерна 700 тыщат тоннат. Ковозонзо среднейстэ 25,8 % покшолгадсь робочейтнень ды служащейтнень заработной платаст, колхозниктнень доходост покшолгадсть 2,8 раз. Ламот колхозтнэ ютасть эрьва ковсто пандомантень. Велетнесэ кепедезь 44 тыщадо ламо од кудот.
Экономикань ды общественно-политической виевгадомась 1965-85 иетнестэ. Те шкастонть экономиканть роботазо сюлмавозь хозяйственной реформанть марто. Сонзэ паро ёнксокс ульнесь тевень ветямонь лувонть лиякстомтомась, мезесь пачтясь Мордовиясо Совнархозонть пекстамонтень. Ушодовсь региональной хозяйственной комплекссэнть тевтнень башка отраслява ды территорива ветямонь лувонть вешнемась. Хозяйственной реформань сехте эрявикс ёнкстнэстэ вейкекс ульнесь экономикасо лезэнь добовамось, козо совавтовсь лавшо предприятиятнень лезэс питнетнень лиякстомась. Теке жо шкастонть планировамонь од системантень ютамось предприятиятнесэ тейсь условият аволь ансяк производствань, истя жо социальной тевтнень свал шкань планировамонть туртов. 1966 иестэ васенцеде ютасть хозяйствань ветямонь од условиятнес «Электровыпрямитель», Саранскоень приборостроительной ды тепловозоремонтной заводтнэ. Республикань индустриянть виевгавтомасо лездась сонзэ территориява Саратов – Горький газопроводонь ветямось. Сонзэ эйс вейсэндявсть Саранскоень, Рузаевкань промышленной предприятиятне, эрямо кудотне ды Комсомольский поселкась. 1960-це иетнестэ газонть вельде топавтовсть уштомапельсэ малав 40 % вешематне. Планонь кемекстамонь од лувось, конань коряс кемекставсть Мордовиянь промышленной производствань сехте эрявикс ёнкстнэ, путозельть 1966-70 иетнестэ народной хозяйстванть виевгавтомань вете иень планонть юрс. Неть иетнестэ продукциядонть нолдазь икелень 15 иетнень коряс седе ламо. Промышленной производствась покшолгадсь пек седе бойкасто, Волго-Вятской региононть ды целанек РСФСР-нть коряс: экономической районганть промышленностень весе продукциясь ламолгадсь 60 %, Мордовиява – 88 %. Тевс ютавтозь 930 миллионт целковойть, мезесь 1,5 раз седе ламо, икелень вете иетнеде; стака промышленностентень савсь весе продукциястонть 53 % ламо.
Покш лиякстомат теевсть электроэнергетикасо. 1967 иестэ саезь Мордовиясь теевсь целанек электрифкациянь республикакс. Промышленностьсэ 1 важодицяс электроэнергиянь ютавтомась 1965 иенть коряс, 1970 иестэ ламолгадсь 1,3 раз. 1970-це иетнень ушодовомсто Мордовиясо теезь васенце снартомат промышленной производстванть государстванть ёндо планировамосо, икелепелев научнасто тешкставсть социально-экономической тевтне-кирдатне. Мольсь производстванть вейсэндямонь тевесь. Од лувсо важодсть 241 предприятия, конат нолдасть 95 % весе промышленной прордукциянть. Мордовиясо васенце покш вейсэндявксокс кармась улеме «Светотехникась» Чаунзасо ды Атюрьевасо филиалтнэнь марто. Мордовиянь промышленностесь ушодсь нолдамо 300 видэнь од машинат, оборудования, 2440 видэнь продукция. Тевс ютавтовсть 23,3 тыща рацпредложеният ды 60 изобретеният. Од техникань коряс 500 мероприятиятнень тевс нолдамодо получазь 2 миллиондо ламо целковойть, олякстомтозь 530 робочейть, кинень эрявсь пандомс 450 тыщат целковойть. Машиностроительной предприятиятне виевгадсть седе бойкасто. Ламолгадсь химической ды медицинской оборудованиянь, приборонь, автоматизациянь средстватнень ды лия – мезень нолдамось. Промышленностенть кеместэ виевгадоманзо пингстэ ульнесть стакачитькак. 1970-це иетнень васенце пельксстэнть киртявсь фондтнэнь лезэвчист, виевгадомань покшолмась эзь ладя тешкстазь лувонтень, хозяйстванть ветямосо ушодовсь ансяк ламочинть мельга панемась. Аволь сатышкасто тевс кармасть нолдавомо производственной фондтнэ ды мощностне. 1970-це иетнень прядовомантень хозрасчётной отношениятне аламонь-аламонь полавтовсть одтнэсэ, зярдо предприятиятне ды организациятне роботасть государственной бюджетстэ явозь ярмактнень лангс. Плановой показателень системась, конань юрокс ульнесь «седе ламо нолдамось», аравтозь производстванть питнейгавтомантень. Республикасонть лоткавтовкшнось промышленной объектнэнь строямост ды аравтнемаст; башка мель явовсь мощностнень лезэвстэ тевс нолдамонтень ды трудонь производительностенть кастомантень. 1980-це иетнень ушодовомантень пек седе аламолгадсь электроэнергиянь нолдамось: 1980 иестэ нолдазь 1 052 миллион, 1981 иестэ – 975 миллион кВт.ч. (эрьва эрицяс ловови 1 070 ды 991 кВт.ч.). Тевтне витевсть 1983 иестэ. Мордовиянь промышленностьсэнть яла покш таликазо ульнесь строительной материалонь нолдамонь индустриянть. Сонзэ виевгадомась мольсь бойкасто. 1985 иестэ весе нолдавиця продукциядонть лововсь 119 % 1980 иень покшолмантень (1980 – 110 % 1975 иень покшолмантень). Истямо ладсо жо тевтне мольсть вирень ды чувтонтень обработкань теемань промышленностьсэнть (лисни 118 ды 110 %). Мордовиянь промышленной производствасонть шожда промышленностесь занясь 14,2 %, пищевоесь – 15,2 %. Пек эрявиксэкс кармасть улеме перть-пельксэнть ванькстэ кирдемань ды производствасо занязь важодицятнень шумбрачист ванстомань кевкстематне. Лиссть стакачить важодицятнень тукшномаст марто. Мордовиясо, кода целанек масторонть келескак, эрявсь алкукс лиякстомтомс велень хозяйстванть, мезесь тешкставсь партиянь ЦК-нь эйзюрковонь (1965 ие) пленумсонть ды совавтовсь 1965-70 иень государственной плантнэс. Юрокс саезель рамамотнень планировамонть од койсэ ванкшномась, мезенть лувсо одс кемекставсь рамамонь планось ды теке жо шкастонть кастовсть рамамонь питнетне.
1980-це иетнень ушодовомантень Мордовиянь велень хозяйствасонть стакачитне яла покшолгадсть. Сон икеле ладсо кадовкшнось лавшокс, печтясь ёмавкст, кассь государствантень долкось. 1990 иенть самс СССР-нь Продовольственной программанть примамось вастозель кода велесэ стакачитнестэ лисемась. Лоткавтовсь лезэнь а кандыця велетнесэ ломантненень эрямо таркань максомась, кармасть ламолгадомо хозяйстватне. Ялатеке эзь удала лоткавтомс велестэ эрицятнень туемаст. Кевейкееце пятилеткастонть велень хозяйствань весемезэ продукциясь колхозтнэсэ ды совхозтнэсэ ламолгадсь 12 %. 1983 иестэ саезь велень хозяйствасо ярсамопелень нолодамось одс теевсь лезэвекс. Республикань промышленностенть ды велень хозяйстванть виевгавтомась кувалгавтызе ломантнень эрямост. 30 % покшолгадсь робочейтнень ды служащейтнень заработной платаст, 45 % кассть вейсэнь хозяйствастонть колхозниктнень доходост, алкуксонь доходтнэ покшолгадсть 1,5 раз. Паро невтемакс ловови сберкассатнесэ вкладтнэнь покшолгадомась: 1965 иестэ – 30 миллионт целковойть, 1970 – 90 миллионт целковойть. 1965 иестэ услугань теемась ламолгадсь 2,3 миллион целковоень ды 1970 иестэ 4,5 миллион целковоень питне, лиякс меремс колмодо ламоксть. Республикасонть кепедезельть малав 2 миллионт м2 эрямо кудот. 1971-75 иетнестэ 35 % ламолгадсть эрицятнень алкуксонь доходост. Ковозонзо средней заработной платась промышленностьсэ кассь 26 %, велень хозяйствасо 40 %. Бытэнь службанть виевгавтомс ютавтозельть 11 миллион целковойть, эрямо кудонь кепедемс – 145 миллиондо ламо целковойть. Максозь 20 миллиондо ламо м2 кудот. 1975-60 иетнестэ эрицятнень алкуксонь доходост кассь 17,2 %. Важодемань кис пандомась 1976 иень 136 целковойтнестэ 1980 иестэ покшолгадсь 143 целковойс. Колхозниктнень ды совхозонь робочейтнень важодемаст кис пандовсь 130,2 целковойть. Товартнэнь башка микшнемась 1975 иень 653 миллионт целковойтнестэ 1980 иестэ ламолгадсь 809 миллионт целковойс. Кемень тыщат эрицяс 1976 иестэ савсь 22,2, 1978 иестэ жо – 27,7 врач. Ярмактнень ламолгадомаст марто киртявсть налогтне. Седе ламо ярмакт кармасть явовомо образованияс, здравоохраненияс ды физической воспитанияс. Покшолгадсть пенсиятне ды ськамост эриця ды ламо эйкакшонь триця аватнень туртов пандоматне. 1965 иестэ саезь ушодовсь колхозниктненень пенсиянь пандомась. Покшолгадсть пенсиятне ды келейгадсть льготатне Ине Отечественной войнасо воёвицятнень ды инвалидтнэнь туртов.
Теевсть лиякстомат микшнеманть, общественной питаниянь, ЖКХ-нть виевгавтомасо ды оштнень ды велетнень мазылгавтомасо. Вадрялгавтовсь ошонь эрицятнень транспортсо обслужовамост. 1966 иенть ушодовомсто появасть васенце троллейбустнэ. Келейгадсь радио- ды телевещаниясь. Тевс нолдазельть автоматической телевизионной станцият Саранскойсэ, Краснослободскойсэ, Темниковасо ды лия оштнесэ ды районтнэсэ. Саранскойсэ панжовсь ламо тевень топавтыця Бытэнь кудо. 1970-це иетнестэ – 80-це иетнень 1-це пельксстэнть покшолгадсь государственной кооперативной торговлянь розничной товарооборотось. Ялатеке социальной тевтнень ветямось пек кадновсь экономиканть виевгадомадонть. Трудонь ды бытэнь условиятнень паролгавтомаст коряс покш робота ютавтыть Мордовиянь профсоюзтнэ. 1970-80-це иетнестэ сынст ушодксост коряс трудонть ванстомантень явозельть малав 30 миллионт целковойть. Паролгавтовсь роботась соцстрахованиянть коряс. Порофсоюзтнэнь путевкаст коряс оймсесть ды шумбрачист витизь 70 тыщадо ламо ломанть. Республикань профсоюзтнэнь улить: Культурань кудост Саранскойсэ, 45 клубост, ДК-ст, 32 киноустановкаст, 52 библиотекаст.
Мордовиянь общественно-политической эрямосонть покш таликазо комсомолонть, кона эсь рядтнэс вейсэндясь 140 тыщадо ламо ломанть. Комсомолонь-од ломанень 220 звенат бороцясть велесэ земледелиянь покш культуранть кис, важодсть 32 объектнэнь кепедемасо, комсомолонь-од ломанень ударной стройкатнесэ. Целанек 1980-це иетнень куншкавидестэнть Мордовиясо, кода весе масторсонтькак, общественно-политической тевтнесэ тешкставсь эрицятнень важодемантень бажамост киртямось, партийной ды советской органтнэнень а кемемась, политической лавшочись ды социальной аладямось.
Реформань, политической ды социально-экономической кемечинь шкась (1985-2001). МР-сэ лиякстоматне мольсть зярыя этапсо. Перестройкань 1-це шкастонть (1985-87) сехте эрявиксэкс ульнесь тевень ветямонь од ёнкстнэнь теемась. Мордовиясо 80-це иетнень 2-це пельксстэнть ванстовсь индустриальной виевгадомань кемечись, зярдо иезэнзэ среднейстэ производствань покшолмась лововсь 5,4 %.
Редявсь сехте эрявикс производственной фондтнэнь покшолгадомась (1985 иенть коряс 1990 иестэ лововсь 1,24 %), промышленной продукциянь нолдамось (некеть жо иетнестэ – 1,3 %). Лиснесть стакачитькак, васняяк велень хозяйствасо. Эрявсь пештямс республикань потребительской рынканть товарсо ды услугасо. Секскак уш те шкастонть планово-экономической системанть кармасть ладямо рыночной экономикань башка ёнкстнэнь марто. 1987 иестэ саезь кемекставсь од, рыночной инфраструктура: товаронь нолдамонь ды услугань топавтомань коряс кооперативть, посредникень фирмат, конат рамсесть ды микшнесть продукциянть, башка ломантнень ёндо товаронь-мезень микшнемась. Республикасонть предпринимателень тевенть виевгавтомантень лездасть прибыленть лангс 10 % налогось, «Государственной вейсэндявкссто» (1987), «Кооперациядо» ()1988), «Вишка предпринимательствантень государстванть ёндо лездамодо» РФ-нь законтнэ. Омбоце шкась (1987-88) тешкстави политической лиякстоматнесэ. Народонь властенть кемекстамга, республикань партийной органтнэ максызь полномочияст се эли тона уровенень советнэнень ды сынст исполнительной комитетнэнень. 1989-90 иетнестэ лангс ливтевсь экономикасо реформатнень политикансетнеде кадновомась, мезесь пачтясь перестройканть кис аштицятнень ютксо явновомантень ды национально-политической вейсэндявксонь теевемантень. 1990-це иетнень ушодовомсто республикасонть теезельть «Домократическая инициатива» клубонь, «Мемориал» Всесоюзной историко-просветительной обществань, «Демократическая Россия» движениянь отделеният, Мордовиянь социал-демократической партиясь, Конституционной демократонь партиянь Мордовской организациясь, Мордовиянь Народной фронтось, Россиянь Демократической партиянь, Россиянь Народной партиянь, «Демократическая Россия» Федеральной партиянь Мордовской региональной отделениятне (вантано «Домократической движениясь), ЛДПР-нь Мордовской региональной организациясь, Мордовиянь Коммунистической партиясь ды седе тов. Эсь программатнесэ сынь аравтсть предприятиятнесэ тевтнень ветямонть, частной предпринимательстванть ды фермерэнь хозяйстванть виевгавтомань задачат. РФ-нь «Общественной вейсэндявкстнэде» Закононть (1991 иень якшамков) нолдамодо мейле партиятне ютавтсть эрявикс политической ды идеологической робота эрицятнень ютксо, кить весементень кармасть явомо седе покш мель. Эрицятнень превест-арсемаст демократизациясь редявсь республикань ды местной советнэс кочкамотнесэ. 1990 иень эйзюрковонь 4-це чистэ ютавтовсть РСФС-нь народной депутатонь кочкамот Мордовиянь 6 территориальной ды 4 национально-территориальной округтнева. 887 избирательной участкатнес сакшность 87,8 % эрицятне. Кемень округтнестэ колмотнесэ изнясть республикань демократической движениянь представительтне. Теке жо шкастонть ютавтовсть кочкамот МАССР-нь Верховной Советс 55 избирательной округтнева. Сехте ламо депутатнэ ульнесть «Демократическая Россия» МРО-нь каршо молиця фракциястонть. 1990 иень ацамковонь 7-це чистэ МССР-нь ВС-нь сессиясонть примазь республикань государственно-правовой статусстонть Декларациясь. МАССР-сь теезель МССР-кс. 1991 иестэ саезель лув российской государственностенть одкстомтомантень, мезесь путсь ушодкс государственно-правовой реформантень. 1991 иень эйзюрковонь 17-це чистэ ютавтозь общесоюзной референдум ССР-нь Союзонть ды РСФСР-нть ванстомадо, РСФСР-нь Президентэнь постонть тевс нолдамодо. Мордовиясо голосовамо сакшность 84,3 % эрицятне.
ССР-нь одкстомтозь Союзонть ванстоманзо кис мелест ёвтызь 80 ламо процентт, РСФСР-нь президентэнь постонть тевс нолдамонзо кис –референдумов сыцятнестэ 68 ламо процентт. Республикань Верховной Советэсь истя жо кемекстызе президентэнь должностенть; МССР-сь теезь Мордовия Республикакс. 1991 иень ацамковсто Мордовиянь Президентэкс кочкавсь В.Д.Гуслянников. 1993 иестэ республикань Верховной Советэсь лоткавтызе те должностенть. 1994 иестэ примазельть МР-нь «Государственной Собраниянь депутатонь кочкамодо», «Мордовия Республикань местной самоуправлениянь представительной органонь депутатонь кочкамодо» ды «Местной самоуправлениянь прявтонть кочкамодо» законтнэ. 1995 иень сундерьковсто ютавтовсть горсударственной властень представительной органтнэс ды местной самоуправлениянь депутатонь кочкамот, мезенть пингстэ кемекставсть МР-нь Государственной Собраниясь, ошонь, райононь, велень, поселкань Советнэ. 1995 иень якшамковсто МР-нь Государственной Собраниянь Председателекс кармась улеме Н.И.Меркушкин, 1995 иень таштамковонь 22-це чистэ МР-нь Конституционной Собраниясонть, мейле жо 1998 иень даволковсто весе народонь кочкамотнесэ сон кочказь Мордовия Республикань Прявтокс.
1995 иень медьковонь 27-це чистэ Примазь «МР-нь референдумдонть» законось, 1995 иень таштамковонь 21-це чистэ – МР-нь Конституциясь, кемекстазь МР-нь государственной властень органонь ды местной самоуправлениянь органонь од лув.
Государственной-правовой реформанть марто вейсэ ютавтовсть структурной социально-экономической лиякстомат: предприятиятнень акционировамось, акциятне явновсть государстванть ды трудовой коллективтнень юткова, теевсь човорявозь экономика (частной секторонть ловозь), аграрной перестройка, лиякстомтовсь трудонь кис пандомась, мезенть пингстэ ломантненень меревсь топавтомс зярыя тевть, лиякстомтовсь банконь системась ды лият. 1990-це иетнень васенце пельксстэнть рынкань отношениятненень ютамось кирдизе республикань социально-экономической виевгадоманть. Киртявсь республикань предприятиятнень роботадост прибылесь, 1 768,5 миллион целковойтнестэ (1991) пачтявсь 479,7 тыща целковойс (1995). Ламолгадсть ёмавксонь кандыця предприятиятне: 1993 иестэ ульнесть 10, 1995 иестэ – 82, 1998 иестэ – 150, 2000 иестэ – 136. 1995 иестэ МР-сэ промышленной производствань покшолмась, РФ-нь 78 субъектнэнь ютксо, занясь 59-це тарка. Састо одкстомтовсть велень хозяйствасо ды промышленностень перерабатывающей отраслятнесэ сехте эрявикс производственной фондтнэ, вишкалгадсть фондтнэнь обеспечамонь ды фондтнэнь лезэвчинь показательте, ламолгадсть колавозь ды ташто оборудованиясь. 1990-це иетнень куншкавидентень стакачить печтясь животноводствась. Производстванть бойкасто лавшомгадоманзо пингстэ аламолгавтовсть республикань малав весе предприятиятнесэ важодицятне, савкшнось важодемс аволь цела чи, ламолгадсть роботавтомотне. 1992 иестэ сындест ульнесть 17,7 тыща ломанть, 1995 – 45,8 тыща ломанть. Производственно-хозяйственной сюлмотнень коламось, государстванть ёндо ярмаконь а явомась, велень хозяйствань продукциянь рамицятнень ярмактомочись пачтясть производстванть лондадомантень кода промышленностьсэ, истя жо велень хозяйствасо. Киртявсь здравоохранениянть, образованиянть, культуранть, спортонть виевгавтомс, войнань ды трудонь ветерантнэнень ярмаксо лездамс, эрицятненень государственной ды кооперативной кудонь кепедемс бюджетстэ ярмаконь явомась. Ярмактнень питнест вишкалгадоманть пингстэ (1984 иенть коряс) 2,6 раз аламолгадсть эрицятнень доходост. 90-це иетнень омбоце пельксстэнть ушодовсь политической ды социально-экономической кемекстамось. Кой-кона предприятиятне бойкасто кармасть тонадомо рынкань условиятненень. «Резинотехника» ОАО-сь, «Биохимикесь» ды лият ламолгавтызь продукциянь нолдамонть. 1995 иень ацамковсто РФ-нь Правительствась кемекстызе 1996-2000 иетнес МР-нть экономической ды социальной виевгадомань программанть 10 триллиондо ламо целковоень явоманть мельсэ кирдезь. Теезь весемесь внешнеэкономической сюлмтнень аравтомаст, кемекстамост ды виевгавтомаст туртов. 1996 иестэ Мордовиясь кемекстась 50 ламо кавто ёндонь соглашеният Россиянь регионтнэнь (Башкортостанонть, Свердловской, Архангельской, Новосибирской областнень ды лия регионтнэнь марто «Большая Волга» ассоциациянть лувсо) ды СНГ-нь (Белоруссиясь, Казахстанось, Украинась) мастортнэнь марто, кемекстась сюлмот Германиянь, Чехиянь, Сириянь, Финляндиянь, Великобританиянь ды лия васоло омбо масторторонь партнёртнэнь марто, Росиянь сехте покш коммерческой банктнень («Возрождение», «Российский кредит», «Инкомбанк», «Онексимбанк», «Тверьуниверсалбанк») марто. 1997 иестэ саезь республикасонть промышленной производствась кармась касомо структуратнень одкстомтомаст, икелев молиця технологиятнень тевс нолдамост, лиянь ярмактнень путомаст вельде; виевгадсь АПК-сь, вадрялгадсь велень инфраструктурась, кепедевсть кудот, школат, больницят, спортонь сооруженият, одкстомтовсь технологической юрось, ютавтовсь предприятиятнень экономикаст кастомасо лездамонь паро лув.
1995 иестэ МР-нь Прявтось кармась улеме «Ладямось. Паро лувось. Одонтень бажамось» тердеманть прявтсо, мезенть коряс анокстазь эрьва кодат экономической, политической ды культурной тевть-кирдат эрямонь весе ёнкстнэнь лиякстомаст, кемекстамост коряс. Неть тевтнень топавтомась ламолгавтызе промышленной производствань продукциянть: 1998 иестэ сондензэ нолдазь (уликс питнетнесэ) 6 147 миллионт целковоень питне, 2000 – 15 миллионт целковоень питне. Покш лиякстомат теевсть велень хозяйствань производствасо: 1995 иестэ нолдазь продукция 6,7 миллион целковоень питне, 2000 – 9,2 миллион целковоень питне. 2001 иестэ заработной платась, 2000 иенть коряс, среднейстэ покшолгадсь 1,5 раз, тень ютксто промышленностьсэ 1,5, строительствасо – 1,7, велень хозяйствасо – 1,6 раз. Ламолгадсть важодиця эрицятне. 1998 иестэ роботавтомотнеде лововсть 58,7 тыща ломанть, 2000 – 47,7 тыща ломанть.
Республикань общественно-политической тевекс ульнесь В.В.Путинэнь Мордовияв самозо. 1999 инь ацамковсто, РФ-нь Правительствань Председателекс улемстэ, сон сакшнось «Большая Волга» ассоциациянь президиумонь заседанияв, мезесь ютавтовсь Саранскойсэ, ды ванкшнынзе 2 № ТЭЦ-нь 4-це очередень, войнань ветеранонь госпиталень од корпусонь строительной площадкатнень, истя жо Ялгань школанть-интернатонть. Сыненст лездамга федеральной бюджетстэнть явозельть ярмакт; 12 № гимназиянть строямонь питнестэнть покш пельксэнть эсензэ лангс саизе РФ-нь Правительствась. 2002 иень медьковсто РФ-нь Президентэсь В.В.Путин ветясь «Большая Волга» ассоциациянь президиумонь заседаниянть, косо шнавсь межбюджетной отношениятнень ладямост ды од ломанень политикасо роботанть коряс Мордовиянь опытэсь; якась пек эрявикс объектнэс, сынст ютксто «Светотехника» стадионов. Структурной социально-экономической реформатнесэ пек эрявиксэкс ульнесь государственной ды муниципальной ули-паронть (васняяк, промышленностень вишкине ды средней предприятиятнень, стройкатнень, транспортонть, бытовой услугатнень) приватизациясь. Хозяйствань ветямонь лувонть полавтомась теевсь рынкань отношениятнень виевгавтонь условиятнестэ вейкекс. Государственной ули-парось ёмавтызе монопольной смустензэ предприятиятнень ламочист, продукциянь нолдамонть ды прибылень получамонть коряс, кадызе тарканть човорявозь, акционерной, кооперативной ды частной ули-паронтень. 1994 иенть самс приватизациясь ветявсь приватизационной чектнень тевс нолдазь, ярмаконь апак пандо. 1994 иень медьковонь 1-це чистэнть саезь ушодовсь государственной азорксчинь предприятиятнень сеть питнетнесэ миемась, конань кемекстынзе рынкась. 1996 иень якшамковонь 1-це чинтень приватизировазь 314 предприятият. Сындест 205 теезь ОАО-кс (47 предприятият федеральной, 92 – республиканской, 71 – муниципальной азорксчинь). Ансяк средней ды покш предприятиятнень акционернойкс теемас эзь кандо лезэ, мезесь пек эряви рыночной хозяйствасонть. 1998 иестэ саезь ушодовсь ярмак лангс приватизировамось, мезесь теевсь государствань ды муниципальной предприятиятнень башка ломантнень кедьс максомга ды МР-нь ды управлениянь муниципальной органонь Ули-паронь фондонь кой-зяро акциятнень миемга. Приватизационной спискантень совавтозь республикасонть весе уликс федеральной предприятиятнестэ 60 ламо процентт, 49 – республиканской, 33 ламо процентт муниципальной азорксчинь.
Кооперативтнень туртов налогонь льготатнень лоткавтомадост мейле (1992-96) ушодовсь вишкине бизнесэнь предприятиятнень лиякстомась, мезентень лездась кредитэнь союзтнэде, вишка фирматненень пандоматнень садстнемаст. Банктнень пельде налогонь саемстэ льготань максоманть кис предприятиятнень-монополистнэнь ответственностест кастомадо РФ-нь нормативной актнэнь примамось. 1996 иень эйзюрковонь 11-це чистэ МР-нь Прявтось нолдась Указ «МР-сэ вишкине предпринимательствантень лездамонть коряс мератнеде», теезь вишкине предпринимательстванть виевгавтомань программа ды те бизнесэнтень лездамонь фонд. 1996 иень якшамковонь 1-це чинтень республикасонть лововсть эрьва кодамо азорксчинь 2 137 вишкине предприятият. Сындест промышленностентень савсть 18,8 %, велень ды вирень хозяйствантень – 4, строительствантень – 26,1, торговлянтень ды общественной питаниянтень – 39,3, транспортонтень ды связентень – 1,4, материально-технической снабжениянтень ды сбытэнтень – 2,2, лия отраслятненень – 7,2 %. Вишкине бизнессэнть важодсть 31 196 ломанть (8,2 % народной хозяйствасо весе важодицятнестэ). 1999 иень якшамковонь 1-це чинтень ульнесть 2 185 вишка предприятият. Торговлясо ды общественной питаниясо – 44 %, строительствасо – 20,55, промышленностьсэ – 15,5, велень хозяйствасо – 4,6, лия тевтнесэ – 15,4 %. Республикань вишкине бизнессэнть сехте ламольть частной предприятиятнеде (90 %); 10 % – аволь вейкине азорксчинь.
Республикасонть аграрной рефоромась ютавтовсь лавшо хозяйстватнень приватизировамга. 1996 иестэ ульнесть 427 колхозт ды совхозт, 1998 – 386, 2000 – 371; сындест кадновицятне лисни 355, 316, 204. Колхозтнэ ды совхозтнэ теевсть организационно-правовой од ёнксокс; одс явшевсть велень хозяйствань предприятиятнень уликс модаст ды ули-парост; теезь крестьянонь (фермерэнь) хозяйстват: 1996 иестэ – 230, 1998 – 308, 2000 – 1 132. Сынст марто вейсэ роботасть промышленностень, транспортонь, лия предприятиянь ды организациянь подсобной хозяйстват. Экономикасонть сехте покш тарка сайсь аволь государствань секторось. Теевсь рынкань инфраструктурась: предпринимателень секторось, эрьва кодамо товаронь рынкат ды недвижимостень рынкат, питней коневонь рынка, трудонь рынка, трудонь государственной ды коммерческой биржатне, информационной системась. Мордовской товарной биржась, козо совить республикань ды Россиянь ошонь 72 предприятият, организацият, фирмат, Потребителень обществась. МР-нть рынкатнень ютксо отношениятнес ютамсто кемекставсь банконь од системась. 1996 иестэ Национальной банкось тейсь 12 коммерческой банкт ды 7 филиалт, конат вейсэндявсть ассоциацияс (вантано «Банк»). Рынкань экономикась тейсь условият предпринимателень од средней общественной слоенть ды МР-нь лия эрицятнень марто социальной партнёрствань системанть кемекстамост туртов.
МР-нь экономиканть эсь тевтнень финансировамонтень, эсь прянть кирдемантень, тевтнень ветямонтень ютавтомасо лездась социально-экономической кевкстематнесэ гласностесь. 1980-це иетнень омбоце пельксстэнть – 90-це иетнень васенце пельксстэнть Мордовиясо кепедевсть национальной кельтнень, культуранть, мокшонь ды эрзянь раськетнень эрямонь койтнень-кирдатнень ванстыця общественной вийтне. Теньсэ покш таликаст национальной движениятнень, кить важодсть раськенть вельмевтемань лозунгонть ало; сынст ушодыцяст – творческой интеллигенциянь представительть. 1989 иестэ теезь «Масторава» общества. Ютавтозь мокшонь ды эрзянь раськень 3 инекужот (1992, 1995, 1999 иетнестэ; вантано «Мокшонь ды эрзянь раськень Васенце Всероссийской инекужось»). 1997 иентень МР-нь Юстициянь министерствасо сёрмадстозь 49 политической партият ды общественной движеният. Сынст ютксо – эрзянь ды мокшонь од ломанень «Од вий», «Вайгель», Тиринь келень Мордовской обществась, Эрзянь келенть идемань А.П.Рябов лемсэ фондось, Мокшонь ды эрзянь раськетнень вельмевтемань советэсь, эрзянь тейтерь-авань «Эрзява» ды мокшонь тейтерь-авань «Юрхтава» ассоциациятне ды седе тов.
МР-со гражданской обществанть кемекстамосо ды виевгавтомасо покш таликазо «Мордовия Республикасо общественной ладямодо ды социальной партнёрствадо» договоронть (1999 ие), конань мельсэ кирдезь эрямонь эрьва кодат тевтнесэ ды ёнкстнэсэ роботыть аволь коммерческой организацият (клубт, вейсэндявкст, фондт). 2001 иентень сындест сёрмадстозь малав 300, профсоюзтнэнь апак лово. Сынст ютксо авань 3 организацият («Мордовиянь тейтерь-авань союзось» ды лият); 9 медицинскойть («Мордовиянь врачень ассациациясь» ды лият), 19 – од ломанень («Мордовиянь тонавтниця од ломанень ассоциациясь», «Атом», «Август», «Торанага», «Мордовиянь од ломанень союзось» ды лият); 4 научной институтт (Целевой прогнозировамонь ды психосистемной тонавтнемань НИИ-сь ды лият); 2 образовательнойть (Президентэнь программань стажёронь ассоциациясь ды лият); 3 – войнань, трудонь, вооруженной виень ветеранонь (Мордовия Республикань Ф.Ф.Ушаков лемсэ Российской Морской собраниясь ды лият); 10 – инвалидтнэнень, сыре ды нужачинь печтиця ломантненень лездамонь («ХХХ пингесь – седемарямонь пинге», «Россиянь Чернобылесь» союзось ды лият); 6 – предпринимательтненень лездамонь (МР-нь торгово-промышленной палатась, «Мордовиянть одкстомтомась» ды лият); 4 – семиянтень ды эйкакштнэнень лездамонь («Преодоление», «Забота» ды лият); 10 – праватнень ды правопорядоконть ванстомань (Правань ванстомань Мордовской республиканской центрась, «Прессань праватнень ванстомань центрась», Солдатонь авань комитетэсь ды лият); 11 национальнойть (Народной ремеслань кудось, Финнэнь-угрань раськень военной налксематнень вельмевтемань «Тюштя» клубось ды лият) ды седе тов. Сынст тевест – ветямс просветительной робота эрицятнень ютксо. МР-нь Прявтонть 2000 иень ожоковонь 17-це чинь Указсонзо кемекстазь МР-нь Прявтонть пингстэ Общественной палата, конань тевезэ – ловомс общественностенть мелензэ-арсеманзо республикасонть сехте эрявикс социально-экономической кевкстематнень ванкшномсто.
|
|
|
Сехте эрявиксэсь 
