|
|
|
Календарь событий
|
|
|
Национальной политикась
|
|
|
|
Ней тееви весемесь эрзянь ды мокшонь раськень культуранть, келенть ванстомантень. Эрицятнень сёрмадстомань меельце даннойтнень коряс, эрзятнеде ды мокшотнеде лововсть 840 тыщат ломанть. Масторонь весе эрицятнестэ сындест лововить ансяк 0,6 процент. Меельце иетнестэ, кода зярдояк теде икеле, кемекставить лезэв сюлмот республиканть ды томбале эриця эрзятнень ды мокшотнень ютксо. Республикасонть важодить кото общественной национальной организацият, татаронь региональной культурно-национальной автономия, мокшонь авань ассоциация ды эрзянь авань союз. Сехте покш общественной организациякс, кона топавты раськетнень вельмевтемань тевтнень, ловови Мокшонь ды эрзянь раськень межрегиональной движениясь. Те движениянь филиалтнэ ламолгадыть масторонть келес. Республиканть томбале теевить мокшонь ды эрзянь раськень национально-культурной автономият. 2004 иестэ республикань Государственной Собраниясь примась закон национально-культурной автономиятненень государстванть ёндо лездамодо. Покш тевекс кармась улеме мокшонь ды эрзянь раськень инекужотнень ютавтнемась. Мокшонь ды эрзянь раськень меельце IV инекужосонть раськенть вельмевтемань пек эрявикс тевтнень ванкшность Россиянь 19 региононь 552 делегатт. Инекужонтень законодательной ушодксонь правань максомась пек покшолнавтызе сонзэ эрявиксчинзэ. Меельце кемень иетнестэ ютавтозь покш робота минек раськень исторической сюпавчитнень тонавтнемаст, сонзэ эсь национально-культурной койтнес малавгавтомань коряс. Нолдазь кементь учебникть ды тонавтомань пособият, художественной литература мокшонь ды эрзянь кельтнесэ. Истя жо – научной важодевксэнь пусмот, этноисториянь ды этнокультурань эрьва кодат тевтнень-кирдатнень коряс монографият. Республиканть эрямосо паро тевекс кармась улеме кавто томсо «Мордовия» энциклопедиянть ды «Мордва» покш тонавтнеманть нолдамось. Республикасонть пек седе ламолгадсть школатне, косо тонавтневить раськень кельтне. Эсь раськентень малавгавтомасо покш таликаст раськень праздниктнень. Мордовиянь историясонть васенцеде республикань Прявтонть Указсо тешкстазь эрьва иестэ ютавтнемс фольклорно-этнографической праздникть «Акша келу», «Раськень озкс», «Славянской письменностень ды культурань чи», «Сабантуй». Саранскойсэ витнезь эрзянь ине цёранть С.Д.Эрьзянь музеесь. Нолдазь скульпторонть произведениянзо марто пек паро альбом. Раськень ансамблятне «Келу», «Умарина», «Торама» парсте невтнить эсь ёрокчист Россиянь ды лия масторонь сценатнень лангсо. Пек содавикст Ташто Теризморга велесэ национальной культурань центрась, Вирь Тавла велесэ чувто ланга кенрсемань коряс школась. Нурька шкас республикасонть теезь мокшонь-эрзянь камерной музыка, мокшонь-эрзянь эстрадань морот, неень шкань раськень киштемат. Кепедеви национальной од театрась. Республикасонть башка мель явови национально-культурной учреждениятнень туртов важодицянь анокстамонтень. Н.П.Огарёв лемсэ университетсэ панжозь раськень культурань факультет. Филологической факультетэсь аноксты специалистт, кить парсте содасызь финнэнь ды венгрань кельтнень. Колмо иеть ютавтневсь международной этнокультурной экспедициясь «Волга – река мира. Диалог культур волжских народов». Сонзэ эйс пурнавкшность Российской Федерациянь ламот таркатнесэ эриця минек раськень представительть. 2005 иестэ экспедицияв якасть Россиянь 12 регионтнэстэ тиринь келень тонавтыцятне. Масторсонок содавиксэкс тееви чувто ланга керсемань коряс «Морыця чувто» международной этнографической фестивалесь- пелькстамось, кона ютавтневи Саранскойсэ. Меельце иетнестэ минек республикасо Мордовиянь Прявтонть Н.И.Меркушкинэнь лездамонзо пингстэ ютавтневить тевть-кирдат, конат сюлмавозь Ф.В.Сычковонь, С.Д.Эрьзянь, М.Е.Евсевьевень, Х.Такташонь, Ш.Камалонь лемст марто ды теде содыть Россиянть келес. Мордовия Республикасо лезэв тевтнень топавтомасо покш таликаст массовой информациянь средстватнень. Те шкастонть ламолгадсть СМИ-тне ды сынь яла седе ламо сёрмадыть виевгадыця гражданской обществанть вешеманзо топавтомадо. Паро се, што ламо ды вадря лиякстоматне теевсть аволь государственной, кинь эйстэяк а аштиця изданиятнень виевгадомаст пингстэ. Неень шкасто республикасонть сёрмадстозь ды важодить 100 ламо свал лисниця печатной изданият ды малав 30 электронной СМИ-ть, конат ладить эрьва кодат ловныцятнень, радионь кунсолыцятнень ды телевизоронь ваныцятнень вешематненень. Келей ды неявикс мель МР-нь СМИ-тненень явови Россиясо. Эрьва кодат федеральной пелькстамотнесэ минек республикань журналистнэнь творческой изнявксост теевсть коекс. Раськень койтнень-кирдатнень, фольклоронть, раськень спортонть ванстомга, вельмевтемга, седе тов виевгавтомга ды эрьва кодат нациятнень ютксо отношениятнень кемекстамга, 2004 иестэ Мордовия Республикань Прявтось примась Указ «Акша келу», «Раськень озкс», «Велень озкс», «Сабантуй» «Славянской письменностень ды культурань чи» республиканской национально-фольклорной праздниктнень эрьва иестэ ютавтнемадо.
|
|
|
Сехте эрявиксэсь 
