|
|
|
Календарь событий
|
|
|
Мордовия Республикась. Природась.
|
|
|
|
Модапотмонь сюпавчитне. Ниле сехте эрявикс группатнестэ (модапотмонь ведтне, рудатне, аволь рудатне ды палыця лезэв ископаемойтне), Мордовиянь моданть потсо улить аволь рудат, конат тевс нолдавить строительствасо, ды модапотмонь ведть (лисить модастонть ды артезианскойть). Сынст теевемаст сюлмавозь четвертичной, мезозойской ды верхнекаменноугольной шкань кадовикс породатнень марто (мезозойской, верхнепалеозойской отложениятне). Панжозь ды тевс нолдавить строительной материалонь анокстамонть туртов сырьянь 120 месторожденият: 5 видэнь сёвонть, суглинкат, чуварт (песокт), пор, мергель, опока, трепел (диатомит) ды лият. Тевс нолдавить шождасто солавтовиця сёвонень, суглинкань ды супесеень месторождениятне, – сынь эрявить кирьпецень ды черепицань анокстамонть туртов (вейсэнь таштавкстнэ малав 50 млн.м3). Сындест сехте покштнэ Рузаевка ёнкссо Левжансесь (4,9 млн.м3), Ромодановскоесь (4,3), Ицялонь ёнкссо Кергудскоесь (3,9), Саранскоенсесь (3,8), Торбеева ёнкссо Северо-Решетинскоесь (3,6 млн.м3). Сындест башка, муезь 15 сёвонев таркат (икелепелев ловоматнень коряс малав 132 млн.м3). Эсенек сырьясто нолдави 75-125 маркань кирьпецесь. Керамзитстэ изделиянь нолдамонть туртов тонавтнезь 8 месторожденият (12,5 млн.м3). Эште 6 лезэв таркатнесэ таштавозь 26 млн.м3. Улить стакасто солавтовиця сёвонтькак Рузаевка ёнкссо Шишкеевской месторождениясь, 403 тыщат м3). Бетононть, силикатной изделиятнень, строительстванть, штукатурямонть-вачкамонть туртов нижнемеловой шкань чуваронть таргить: Кочкурова ёнксонь 1 № Воеводской, 2 № Воеводской; Ковылкина ёнксонь Кичатовской, Кочелаевской, Парапинской, Рузаевка ёнксонь Ускляйской ды Шингаринской, Зубова-Поляна ёнксонь Явасской ды лия карьертнэстэ (весемезэ таштавозь 50 ламо млн.м3). Покш Березникень, Ельникинь, Инсаронь, Рузаевкань ды Темниковань ёнкстнэсэ эште 8 лезэв таркатнесэ таштавкстнэнь икелепелев ловоматне 100 ламо млн. м3. 1961 иестэ панжозь суликакс чуваронь Решетинской месторождениясь, мезесь пек эряви светотехнической промышленностень продукциянь нолдамонть туртов. Икелепелев ловозь таштавкстнэде 2,3 млн.м3. Муезь човор чуваронь-вишка кевнень (гравиень) таркат Староямской теевемась, таштавкстнэде 0,8 млн.м3). Ельникинь ёнкссо Уркатонь беректнень кувалт лангс лиснить верхнекаменноугольной шкань строительной кевть (доломитт, известнякт): Будаевской месторождениясь, таштавкстнэде 12,7 млн.м3. Тешкстазь чуваронь 5 таркат (4,4 млн.м3) Отяжелень, Дубёнкань, Ицялонь ёнкстнэсэ. МР-нь модапотмонь сехте эрявикс сюпавчитнестэ вейкесь – цементэнь нолдамонть туртов сырьясь. Верхнемеловой шкань мергелень-поронь ды опокань таштавкстнэ (357,6 ды 156,2 млн.м3) кирдевить цементэнь сырьянь Алексеевской месторождениясонть. «ЛАТО» ОАО-нть продукциянзо содасызь республиканть томбалеяк. Атемарень месторождениятне сюпавт порсо, кона моли строительной известень нолдамонть туртов (муезь таштавкстнэ 6,1, икелепелев ловоматнень коряс – 9,2 млн.м3; вантано «Атемарень диатомитэнь таркатне. Кремнийсэ сюпав породатне»). Модапотмонь лия лезэв сюпавчитнень ютксо – фосфортнэ, кшнись, палыця сланецтнэ, торфось, минеральной артомкатнень туртов сырьясь, гипсэсь, морязь раужо тумось ды лият. Сень мельсэ кирдезь, што сындест аволь ламо, аштить пек домка таркасо, ламотнень промышленной таргамост зярс лезэ а канды. МР-нь моданть потсо ламо симемаведь. Ведтне – лазовксонь-пластонь, виевстэ лисицят (лисемань сэресь 21-27 метрат). Саранскоень ды райцентрань эрицятненень максовить артезианской ведть палеозойской шкань доломитнестэ ды известняктнестэ. Велень эрицятне истя жо тевс ютавтыть модапотмонь ведтнень.
Ведтнень кирдемань домкачиденть покшолгады сынст минералсо сюпалгадомась: вере – симемаведесь, куншкасо – минералсо сюпалгавтозь, седе ало – салов ведть.
Рельефесь. МР-нь сехте покш пельксэнть зани Приволжской возвышенностесь, Чивалгома ёно – Окско-Донской низменностесь. Сынст ютксто явовить 3 равнинат: эрозионно-денудацкой, омбоцеде морявозь ды ведень-эень.
Эрозионно-денудацкоесь зани Мордовиянь обед ды обед-чилисемва ёнкстнэнь. Сехте покш сэресь 280-320 метрат (337 метрат Чаунзань ёнкссо), сехте вишкине сэресь – 89 метрат (Дубёнка ёнкссо Сурань поймасонть). Равнинатнесэ яла лазновить модатне. Лазовкстнэнь мик эрсить 120 метрань сэрьсэ. Башка таркатнесэ моданть витьстэ лазновомань форматнень тусточист 1 км/км2 ламо. Равнинась явнови Покш Кша, Вишка Кша, Штырма, Лаша, Чеберчинка, Исса лейтнесэ. Долинатне (кужотне) аволь вейкеть. Кужонь чивалгома ды обед ёнксонь пандтнэ сэрейть, чилисема ды пелеве ёнксонь – вандорат. Вишка леень кужотнесэ вастневить аккумулятивной, эрозионной ды цокольной террасат. Сурань вить берекось сэрей, таркань-таркань лондадозь-сезезь, кершесь – вандора. Пойматнень велькссэ террасатнесэ вастневить чуваронь таркат ды чуваронь губорькст 500-700 метрань кувалмосо, сэрест 15 метрат, конат аштить пелеве-обед ёнксстонть седе ало, явноваить болотав вандора таркатнесэ, пандонь породатнень валакавтовомадост теевиця котловантнэсэ. Кочкурова – Чаунза – Отяжеле линиястонть саезь Чивалгома ды Пелеве ёнов малав 80 метрань сэрьсэ лисезь, модань лазновомадонть-пандонь породатнень валакавтомадонть теевиця равнинась юты омбоцеде морявомантень (денудационной равнинась, кона теевсь пандонь-морявомань васенце рельефсонть). Сонзэ сехте покш сэрезэ, мезесь малавикс Мордовиянь центральной ды чивалгома ёнксонь лейтнень ведест явновомантень, 270-280 метрат . Ведень явовома таркатне вандорат ды цють кепедезь, келест 2-3 км. Инсардонть Чилисема ёнов аштить кеме породат, конатестэ ламотненень мерить пандт (Пиксяси, Каменка, Питерка ды лият), Вадань ды Сивининь бассейнатнесэ, Мокша ды Ратор лейтнень ютксо, Раторонь керш берексонть ашти ведень-эень вандора равнинась, эень ведтнесэ кадовикс чувартнэнь марто. Сехте сэрей таркась 150-180 метрат. Лиятнеде явови келей водоразделтнэсэ – 8-10 км., алкине ды аламодо явновиця пандынетнесэ. Водоразделтнэнь лангост сеедьстэ вельтязь чуваронь губорькссэ, пандтнэнь ведтнесэ шлявомадост-лондадомадост, Мокшанть ды Раторонть ютксо жо – карстовой лушмотнесэ, сеедьстэ сынь болотавт. Мордовиянь центральной ды чивалгома ёнкстнэсэ сехте покш кужось – Мокшансесь (башка таркатнесэ келезэ 15 км.) ды Раторонсесь. Сынст вить чаматне сэрейть. Сындест явови Мокша леенть чудемань куншкавидесэнть кужось, кона таргави керш ёнов. Кужосонть улить поймат ды пойма велькссэнь колмо террасат.
МР-нь климатось ашти сонзэ физико-географической аштема таркадонть, эдь Мордовиясь сови Рузонь равнинанть куншукавидсэ аволь пек якшамо таркантень, мезенть парсте невтить иень шкатне. Чинь радиациясь, кода климатонть теиця сехте эрявикс ёнкстнэстэ вейкесь, покшолгады ацамковсто 5 саезь 58 кДж/см2 аштемковсто. Радиационной балансось 92 кДж/см2. Чипаесь иезэнзэ валдомты малав 1850 част, ацамковсто-якшамковсто – 35-45, аштемковсто-медьковсто – 280-290 част. Иезэнзэ среднейстэ коштонь температурась 3-4оС, сехте якшамо ковстонть (якшамковсто) средней температурась – 11,5-12,3оС, лембе шкастонть (медьков) – 18,9-19,8оС. Тундонь меельце кельмтне, ландшафтонть мельсэ кирдезь, эрсить панжиковонь 4-16-це читнестэ, сёксень васенце кельмтне лоткить пракшномодо панжиковонь 17 – аштемковонь 5-це читнестэ, сексня ушодовкшныть таштамковонь омбоце пельксстэнть. Якшамовтомо шканть кувалмозо 149 чить. Тикшетнень-мезтнень касомань шкась (чинь средней температурась 5 ламо градуст С) 178 чить, виевстэ касомань (10 ламо градуст С) – 137-143 чить. Климатонь сехте эрявикс параметратне кемекстыть арктической коштонть, сон аволь пек якшамо широтань ды лембе. Сехте сеедьстэ коштось аволь пек якшамо широтань – континентальной ды морской. Морянь коштсонть кирдеви ламо летьке, тельня сеедьстэ эрси лембелгадомань тувталокс, кизна – якшамонь. Континентальнойтне кизна коськть, тельня жо кандыть якшамо. Арктической коштонть эцемась пек валгстсы температуранть, тунда сынст марто сюлмавозь якшамотнень ды кельмтнень велявтомась. Сеедьстэ коштось эрси континентальной ды морской тропической. Обед-чивалгома ёнксонь варматнень пингстэ тунда-кизна эрсить коське шкат. Иезэнзэ вармась среднейстэ пуви 3,3-4,8 м/сек. Иезэнзэ среднейстэ летькеденть пры 480 мм, сынст Пелеве-Чивалгома ёндо саезь Обед-Чилисема ёнов цютькеде аламолгадомсто. Сехте ламо пиземеть-мезть эрсить лембе шкатнестэ (чадыковсто-ожоковсто) – 70%. Сехте ламо осадкат пракшныть медьковсто-ожоковсто – 65 мм, сехте аламо даволковсто – 15-30 мм. Тень мельга ваномань весе историянь перть сехте аламо осодкат пракшность 1972 иень умарьковсто-ожоковсто – 2 мм. Тикшетнень-мезтнень касома (вегетационной) шкастонть среднейстэ пракшныть 300-360 мм, 10 иес весть – 155 мм седе аламо. Васенце ловось сехте сеедьстэ пракшны ожоковонть прядовомсто, лиясто те шкась колсеви 2-3 недляс. Республикань сехте покш пелькссэнть ловось парсте озы сундерьковонть прядовомсто. Паксясо сонзэ сэрезэ среднейстэ 25 см, вирьсэ 40-70 см. Кирдеви 140-150 чить. Ловонь соламонть ушодовомсто ведтенть среднейстэ таштави 60-120 мм. Ловось солы чадыковонь 8-13-це читнестэ. Ламо иень перть псиденть ведесь коськи – 390-460 мм. Модась кельмси 60-120 см., якшамо ды аламо лов марто телетнестэ – 120-150 см. Модатне солыть чадыковонь 20-25-це читнестэ. Климатсонть кажонь тевекс ловови эйгажась (10-15 чить), даволтнэ, коське шкатне. Даволтнэ сехте сеедьстэ эрсить якшамковсто-даволковсто. Аволь виев коське вармат эрсить малав эрьва иестэ, виевть Мордовиянь чивалгома ёнкссо – 10 иес нилексть-котоксть, чилисема ёно – котоксть-сисемксть, весе таркатнесэ пек коське погода – 10 иес – весть-кавксть.
Лейтне. Мордовия Республикасо 1525 лейть, сынст вейсэнь кувалмост 9 ламо тыщат км., сындест 86 % кувалмост 10 седе аламо км. Малав 9 % лейтнень кувалмост 10-25 км. МР-нь 47 % весе площадесь кандови Сурань бассейнантень, 53 % – Мокшань. Сурань бассейнань 12260 км2, Раторонь бассейнась зани 7880, Инсаронь бассейнась – 3860. Мокшань бассейнань 13920 км2, Вадань бассейнась зани 4330, Парцань бассейнась – 2200. 24 вишка лейть ды 206 пек вишкине лейть ды чудикерькст прыть Сурас, 30 вишка лейть ды 185 пек вишкине лейть ды чудикерькст – Мокшас.
Сехте эрявикс лейтне
| Леесь |
Кувалмось, км. |
Байссейнанть покшолмазо, км2 |
| Ратор |
296 (130)* |
11200 (7880) |
| Вад |
222 (114) |
6500 (4330) |
| Выша |
179 (24) |
4570 (280) |
| Инсар |
168 |
3860 |
| Исса |
149 (98) |
2350 (1790) |
| Мокша |
656 (320) |
51000 (13920) |
| Сивинь |
124 |
1830 |
| Сура |
841 (120) |
67500 (12260) |
| Парца |
117 (92) |
2700 (2200) |
| Пьяна |
436 (28) |
8060 (360) |
* Скобкатнесэ максозь МР-со лейтнень кувалмост ды байссейнатнень покшолмаст.
Эрьктне. МР-со сехте ламо эрьктне теевсть лейтнень малава (поймань эрькть). Сынь явовсть лейтнень чудема таркастост. Лангс ваномс кувакат эли мендявозь (Инеркась, Иноркась, Жегаловась, Покш Палкинась ды лият). Сехте чуросто вастневить карстовой котловантнэ (Мордовиянь пелеве-чивалгома ёнксось), сындест сехте покшось – Ендовища эрькесь. Республикасонть сехте покш эрькесь – Инеркась.
Болотатне эрсить низинань, лия таркас ютницят ды вере таркасо теевицят. МР-со болотатне занить 16,5 тыща гектарт. Сындест сехте ламо Раторонь, Мокшань, Сурань кужотнесэ.
Модатне. Аволь вейкеть топографической уровентне, рельефесь, моданть теиця породатне, тикшетне-мезтне, климатось МР-со кемекстызь эрьва кодамо группань модатнень теевемаст. Республикасонть 12 типень, 25 эрявикс подтипень ды пек ламо родонь ды видэнь модат. Сехте ламо кулововт, вирень серой, вирень серой глеевойть, раужо модат, лугань-чернозёмт, илэв модат, латконь-болотань модат. Кадовикстнэ вастневить аволь покш участкасо. Куловов модатне сехте сеедьстэ вестневсть чивалгома ды пелеве-чивалгома ёнкстнэсэ – Атюрьевань, Ельникинь, Зубова-Полянань, Ковылкинань, Класнослободскоень, Теньгушевань, Темниковань, Торбеевань, вастневить пелеве-чилисема ёно – Орданьбуень, Покш Игнатовань, Ицялонь ёнкстнэсэ. Чивалгома ёно вирень серой модатне явовить 3 подтипев. Валдо серойтне (8,7 %) вастневить Атюрьевань, Дубёнкань, Ельникинь, Зубова-Полянань, Краснослободскоень, Лямбирень, Ромодановань, Рузаевкань, Темниковань, Теньгушевань, Торбеевань, Чаунзань ёнкстнэсэ; серойтне (17,09 %) – Дубёнкань, Зубова-Полянань, Краснослободскоень, Лямбирень, Ромодановань, Рузаевкань, Ташто Шайговань, Теньгушевань, Чаунзань ёнкстнэсэ; чопода-серой (10,7 %) – сехте ламо Ковылкина ёнксонь обед-чилисема пелькссэнть, Инсаронь ёнксонь чивалгома, обед-чивалгома ды пелеве, Рузаевка ёнксонь пелеве-чивалгома, Ромоданова ёнксонь обед-чивалгома, Отяжелень пелеве-чивалгома пелькссэнть, истят Ицялонь ды Ташто Шайгова ёнксонь пеледест ламо модатне. Вирень серой глеевой модатне вастневить вандора таркатнесэ вирень серой модатнень ютксо, пандочаматнень ало, аволь сатышкасто парсте костязь таркатнесэ. Сындест 19 тыщат гектарт, 1,2 велень хозяйствань весе паксятнестэ. Раужо модат вастневить эрьва косо. Явовить 2 сехте покш таркатне. Васенцесь ашти Вадско-Мокшанской водоразделсэнть, ков совить Атюрьева, Ковылкина, Краснослободск, Темникова ды Торбеева ёнксонь сехте ламо соксевиця-видневиця модатне, омбоцесь – республикань куншкавидень ды чивалгома пелькстнэсэ (Орданьбуень, Отяжелень, Ицялонь, Кочкуровань, Лямбирень, Ромодановань, Рузаевкань ды лия ёнксэ). Занить 564,3 тыща гектарт, 34,6 % весе соксевиця-видневиця паксятнестэ ды 46 % – покшолмастонть. Поймань модатне занить 11 % весе соксевиця-видневиця модатнестэ. Сындест покш пельксэсь ашти лугань летьке модатнень ало, конат седе сеедьстэ тевс нолдавить велень хозяйствасо. Леень чудема таркатнень маласо пойматнесэ модатне поймань тикшевть, куншкавидетнесэ – лугань поймань, коськиця эрьктнень перька, васняяк, террасань пелькстнэсэ – аллювиальной болотань иловато-перегнойно-глеевойть ды аллювиальной болотань иловато-торфянойть. Республикасонть 409, 1 тыща гектарт (15,7 %).
Тикшетне, чувтнэ ды лия мезесь МР-со кармасть касомо эень шкадонть мейле климатонть полавтневеманзо, растительной мирэнть ды ломантнень ёндо хозяйственной тевтнень ютксо виев пелькстамонть пингстэ, мезесь сехте пек редявсь меельце колмосядт иетнестэ. Тикешетне-мезтне невтезь растениянь весе отделтнэсэ, якстере ды бурой ведьтикшетнеде башка, – 113 семействань 1320 ламо видэнь сосудистой растеният. Сындест цецянсетнеде малав 1290 видэнь, лангсо видьме мартотнеде – 3, кинялонь (папоротникень) кондятнэде – 18, уроньбулонь кондятнэде – 8, уицятнеде – 5. Нупонень кондятнэде ды сехте алкинетнеде 186 видэнь пангт, 83 – лишайникть, 77 – нупонть сёрмадозь Мордовской государственной заповедниксэ. Сехте покш таркат занить келей лопа марто чувтонь вирьтне ды лугань стептне (вирень степесь), конат пек вишкалгадсть соксемаст пингстэ. Республикань ды Раторонь керш берексо чивалгома ёнксонь чуваров ды чувар марто човор модатнесэ касыть пичень ды пичень-келей лопа марто чувтонь вирть – обед ёнксонь тайгастонть кадовикс пелькст – ды Мокшань ды Сурань пойматнень велькссэ террасатнесэ интразональной пичень вирть. Виртнеде 744,3 тыща гектарт, 27,6 % республикань территориястонть. Виртнесэ сехте ламо касыть пичеть, килейть, тумот, пекшеть, пойть, лепеть ды сиртть, конат озавтнезь башка эли човор. Мордовиянь сехте покш таркатнесэ касыть келей лопа марто чувтт – тумот ды пекшеть, супесчаной ды чуваров модатнесэ – пичеть-покш лопа марто чувтт ды ансяк пичеть, летьке таркатнесэ – лепеть.
Ракшатне. МР-со 247 видэнь нармунть, 73 – млекопитающейть, 39 – калонь кондят, 11 – амфибият, 7 – рептилият (гуйть, метьказт ды лият мезть). Эрьва кодат ракшатнень эрямонтень лезды се, што Мордовиясь ашти вирень ды вирень степень зонань границянть лангсо. Республикань покш пелькссэнть ведень-болотань фаунадонть башка явовить: калтнэ, земноводнойтне, пресмыкающейтне, нармунтне (уткатне, куликтне, выптне, транзейтне, крачкатне, серой каргтне), млекопитающейтне (выхухолесь, куторась, ведень полёвкась, ведьгрысась, бобрась, норкась). Кизна лейтненень ды эрьктненень валгить сярдтнэ, идем тувотне, косулясь, петнав оленесь. Парсте тонавтнезь пиче вирень эрицятне: сувозейтне, эрьва кодамо тюсонь толга марто покш ды раужо шекшататне ды седе тов. Коське вирьбулотнесэ эрить позвоночник марто ды позвоночниктеме эрьва кодат унжат-мезть. Пек ламо лапужа ды лия салмуксоньзалыцятнеде, конат вечкевить нармунтненень ды млекопитающейтненень. Тей сакшныть идем тувот ды лият-мезть. 1990-це иетнестэ теевсть паро условият серой паксяновтнень, кочкодыктнень, пичекивгетнень ды лия нармунтнень туртов.
Коське вирьбулотнесэ тумо виртненень ютамо таркасонть эрить тырдазт, шекшатат, поползенть, пиже озяст, гулькат ды седе тов. Млекопитающейтнеде тесэ эрить чеерть, полёвкат. Ламолгадыть идем тувотне, горностайтне, куницатне, ашо нумолотне, сярдтнэ, сувозейтне. Ламолгадыть позвоночниктеметне, сехте пек калгодо сёлмо мартотне, коткудавтне, шанжавтне. Таркань-таркань пек ламолгадсть гуйтне (гадюкась). Болотав таркатнесэ ракшатнеде-мезтнеде аволь ламо. Чуростсо вастневить лембень вечкиця метьказт (кирнявтницят) ды седе тов. Степекс теевиця таркатнесэ эрить ашо питерькайть, паксянь норовжорчт, кочкодыкть, серой паксяновт, юмборгеть ды лият.
|
|
|
Сехте эрявиксэсь 
