|
|
|
Календарь событий
|
|
|
Культурась
|
|
|
|
Меельце кемень иетнестэ республикасонть удалась ванстомс аволь ансяк культурань виенть, истя жо пек седе сонзэ покшолгавтомс. Мордовиясо ламолгадсть республиканской творческой коллективтне. Сынст юткс совасть «Росичи», «Разгуляй» ансамблятне, камерной оркестрась, республиканской джазовой оркестрась. Примазь решения И.М.Яушев лемсэ музыкальной театранть теемс Оперань ды балетэнь театракс. Мордовиянь прявтоштонть ней эряви кортамс кода Россиянь культурань покш центрадонть.
Республикань прявтнэнь ёндо свалшкань лездамонть пингстэ кемекстави культурань ды искусствань учреждениятнень ды учебной заведениятнень материальной базаст. Одкстомтозь Рузонь государственной драматической театрась, С.Д.Эрьзя лемсэ изобразительной искусствань республиканской музеесь, Интернат марто эйкакшонь республиканской школась, Республиканской хореографической школась. Парсте моли А.С.Пушкин лемсэ национальной библиотекантень кавксо этажсо строявксонть кепедемась.
Культурань од кудот кепедезь Инсарсо ды Кемлясо, одкстомтозь Культурань кудось Темниковасо. Молить строямонь роботат Дубенкасо, Теньгушевасо, Краснослободскойсэ ды культурань зярыя лия кудотнесэ ды клубтнесэ.
Меельце кемень иетнестэ полавтовсть аволь ансяк культурань учреждениятнень чачост, сыненст эрявикс ули-паронь максомаськак. Ансяк Л.П.Кирюков лемсэ Саранской музыкальной училищантень 2002 иестэ рамазельть музыкальной инструментт 12 миллионт целковоень питне. Компьютерт ды ксерокст максозь республиканской библиотекатнес, весе муниципальной централизованной библиотекатнес. «Пушкинская библиотека» проектэнть лувсо рамазь ды ансяк велень библиоткатнес максозь 50 ламо тыщат томт отечественной литературань классиктнень кочказь произведеният, справочникть малав 2 миллионт целковоень питне. Кемень иеде теде икеле ламот библиотекатне ульнесть пекставома лангсо. Книгань фондось пек киртявсь. Ней теевсь коекс сонзэ покшолгавтомась. Культурань отраслянтень государстванть ёндо лездамось касты сонзэ эйсэ важодицянь тевентень бажамонть, вадрялгавты сынст эрьва чинь трудост ды творчестваст. Меельце иетнестэ Саранскоесь велявтызе театральной ошонь икелень лементь. Республикань театратне эрьва иестэ совавтыть эсест репертуарс малав кемень премьерной спектаклят. Парсте моли Саранскойсэ П.И.Чайковскиень «Лебединое озеро» балетэсь ды Дж.Вердинь «Аида» оперась (И.М.Яушев лемсэ государственной музыкальной театрась), А.Островскиень пьесанзо коряс «Банкрот» (Рузонь государственной драматичкеской театрась), «Масторава» эрзянь эпосонть коряс «Тюштя» (Мордовской государственной национальной драматической театрась), «Солдатский котелок» (Куклань государственной театрась) спектаклятне. Яла седе ламо ваныцят пурныть аволь ансяк васенцеде путовиця, мик умонь спектаклятнеяк. Концертной покш робота ветить Мордовской государственной филармониянь коллективтне, моронь ды киштемань «Умарина» ансамблясь, Государственной камерной хорось, моронь «Росичи» театрась. Покш изнявкс марто ютась Китайсэ «Разгуляй» ансамблянть гастролензэ. Филармониянь коллективтне 2004 иестэ невтсть 50 ламо концерт республиканть томбале эриця минек раськетненень. «Умарина» ансамблясь парсте невтизе Мордовиянь вокально-хоровой ды киштемань искусстванть Болгариясо «Витоша» международной фестивальсэнть. Меельце вете иетнестэ камерной хорось пелькстамонть лувсо аволь весть сайнесь Приволжской федеральной округонь социальной ды культурной проектэнь ярмункань грантт.
Саранскойсэ яла седе сеедьстэ кармасть ютавтневеме покш тевть-кирдат. Мордовиянь прявтошсонть ютась Поволжьянь ды Приуральянь композитортнэнь музыкань 17-це фестивалесь. «Большая Волга. Искусство республик Поволжья» межрегиональной художественной выставкась минек прявтошсо пурнась Россиянь 10 регионсто 300 ламо худажникть, скульпторт, графикть, декоративно-прикладной искусствань мастерт. Мордовиясо парсте анокстазь эрьва иестэ ютавтневи джазовой музыкань «Вейсе джаз» международной фестивалесь, истямо жо статус максозь классической музыкань «Декабирьские дивертисменты» фестивалентень. Россиянь весе таркатнестэ сакшныть патриотической моронь морыцят Всероссийской фестивалев-конкурсов. Фестивальтне, конкурстнэ, профессиональной искусствань, народонь ёрокчинь ванкшноматне – те аволь ансяк паро тев. Те корты седе, што народось эри весеме ёндонь паро эрямосо. Пек ламо ваныцят эрьва иестэ пурныть республикасонть ютавтневиця эйкакшонь творчествань «Пластилиновая ворона», од ломанень музыкальной творчествань «Мастер хит», народной творчествань «Седяк, гармония» фестивальтне. Сехте покшокс жо, ков сакшныть ламодояк-ламо морыцят-киштицят, стихень ловныцят ды ваныцят, теевсь народной творчествань республиканской фестивалесь, кона ютавтневи зярыя этапсо ды пек вечкеви Мордовиянь эрицятненень.Те фестивалесь эрьва иестэ ютавтневи Мордовия Республикань Прявтонть Н.И.Меркушкинэнь ушодксонзо коряс. Сон жо ёвтызе сындест вейкенть лемензэ – «За согласие и примирение». Пек парсте ютасть «Фольклор земли мордовской», «Молодое поколение – новому веку», «Россия – это мы», «Земли моей талантливые люди», «Шумбрат, Мордовия!» фестивальтне. Зярдояк икеле Мордовиянь эрицятне эзть некшне истят покш тевть-кирдат, кодат Мордовия Республикань Вишкине Олимпийской налксематне, Приволжской федеральной округонь Вишкине Олимпийской налксематне. Алкуксонь покш тевекс ульнесь «Салют, Победа!» театрализовнной праздникесь, кона 2005 иень панжиковонь 8-це чистэ ютавтовсь республикань главной стадионсонть 1941-1945 иень Ине Отечественной войнасонть Изнямонь 60-иетнень честьс. Сонзэ эйс сакшность 5 тыщат морыцят-киштицят ды 20 тыщат ваныцят. Те ульнесь алкуксонь питнейдеяк-питней казне войнань ветерантнэнень ды тылэнь тружениктненень, кить ульнесть театрализованной праздникень сехте учневиця ды почетной инжекс.
|
|
|
Сехте эрявиксэсь 
