|
|
|
Календарь событий
«
Ф Е В Р А Л Ь
»
«
2012
»
| |
|
|
Мордовия Республикась
|
|
Мордовия Республикась – республика (государства), РФ-нь вейкеть права марто субъект. Ашти Восточно-Европейской (Рузонь) равнинань куншкавидсэ, Ока ды Сура лейтнень ютксо. Прявтошось – Саранскоесь (339,5 тыща эрицят). Мордовия Републикасо эрить 888 тыщат ломанть (2002 иестэ весе Россиянть келес эрицятнень сёрматстомань даннойтнень коряс). Государственной келекс лововить рузонь келесь, мокшонь ды эрзянь кельтне.
1928 иень медьковонь 16-це чистэ Средне-Волжской областенть составсо теезь Мордовской округ, 1930 иень якшамковонь 10-це чистэ сон теезь Мордовской автономной областекс. 1934 иень ацамковонь 20-це чистэ саезь – Мордовской Автономной Советской Социалистической Республика, 1990 иень ацамковонь 7-це чистэ – Мордовской Советской Социалистической Республика, 1994 иень якшамковонь 25-це чистэ – Мордовия Республика. Неень шкасто эрямос ютавтовиця Мордовиянь Конституциясь примазь 1995 иень таштамковонь 21-це чистэ МР-нь Конституционной Собраниясонть.
Территориясь ды границятне. МР-нть покшолмазо 26,1 тыща км2. Таргави Чивалгома ёндо Чилисема ёнов малав 280 километрань тарка, Пелеве ёндо Обед ёнов 55 километрасто саезь 140 километрань тарка (координатнэ 53о40’ ды 55о15’ с.ш., 42о12’ ды 46о43’ в.д.). Границянзо ютыть: Чивалгома ёно – Рязанской, Пелеве ёно – Нижегородской, Чилисема ёно – Ульяновской, Обед ёно – Пензенской областнень, Пелеве-Чилисема ёно – Чувашской Республиканть марто. Московсто саезь Саранскойс – 642 километрат. Сови Приволжской федеральной округс.
STRONG>Экономико-географической положениясь. Мордовия Республикась сови РФ-нь ламо эриця марто ды парсте тонавтнезь зонс. Республикаванть ютыть пек эрявикс чугункань кить, трубопроводт ды автомобильной кить, конат сюлмить европейской пельксэнть –Уралонть, РФ-нь Пелеве ёнксонть – Поволжьянть марто. Теезь виев народно-хозяйственной комплекс, ламо отраслянь промышленность ды велень хозяйства марто.
Административно-территориальной явновомась. Мордовия Республикас совить велень 22 районт, ошонь 1 округ (Саранск) ды районной подчинениянь 6 ошт (Ковылкина, Рузаевка, Ардатов, Инсар, Краснослободск, Темников); 19 робочей посёлкат, 1 313 велеть, конат вейсэндязь велень 421 администрацияс.
Государствань строесь. Мордовия Республикась эсь территориясо топавты целанек государственной властенть сеть полномочиятнеде башка, конат РФ-нь Конституциянть лувсо кандовить РФ-нтень, истя жо РФ-нь ды МР-нь конституциятнень коряс топавтовить РФ-сэ ды МР-сэ. МР-сэ государствань властесь топавтомсто явнови законодательнойкс, исполнительнойкс ды судебнойкс. МР-нь властень органтнэс совить:
-
Мордовия Республикань Прявтось – сехте покш должностень топавтыцясь, сонзэ кочки Государственной Собраниясь Росиянь Президентэнть ёвтамонзо коряс. Ашти МР-нь Правительстванть прявтсо, МР-нь Государственной Собраниянть марто толковазь аравты правительствань председателенть, кемексты правительствань структуранть;
-
МР-нь Государственной Собраниясь (вейке палатань) – МР-нь государственной властень высшей законодательной (представительной) орган, кочкави 4 иес. Сон теи лиякстомат МР-нь Конституциянтень, топавты законодательной ушодкст РФ-нь Федеральной Собраниянь Государственной Думасо, ваны РФ-нь ды МР-нь законодательстванть, истя жо МР-нь бюджетэнть топавтомаст мельга, топавты лия тевть, конат путозь МР-нь Конституциясонть ды законтнэсэ;
-
МР-нь Правительствась – МР-нь властень свал важодиця высшей исполнительной орган, конань кемексты ды прявтсонзо ашти МР-нь Прявтось, теи отчёт МР-нь Государственной Собраниянтень. Ашти председательстэ, председателень полавтыцясто, министрасто ды МР-нь государственной властень исполнительной органонь лия прявтнэстэ. Аноксты республикань бюджетэнть ды ваны сонзэ топавтоманзо мельга; аноксты МР-нь социально-экономической виевгадомань программатнень; топавты МР-нь ули-паронть марто сюлмавозь тевтнень ды лия тевтнень-кирдатнень, конат сонзэ лангс путозь МР-нь Конституциясонть, федеральной законтнэсэ, МР-нь законтнэсэ ды РФ-нь лия нормативной правовой актнэсэ;
-
МР-нь судебной системась – РФ-нь вейкине судебной системань звена. Кемекстави РФ-нь Конституциясонть, федеральной законтнэсэ, МР-нь Конституциясонть ды МР-нь законтнэсэ.
МР-нь оштнесэ, посёлкатнесэ, велетнесэ ды лия таркатнесэ тевтнень ветить местной самоуправлениянь органтнэ. Местной самоуправлениясь топавтови эрицятнень мелест-арсемаст ёвтамонь эрьва кодат ёнкстнэнь (референдумт, промкст ды седе тов), самоуправлениянь кочказь ды лия органтнэнь вельде; лезды эрицятненень эстест топавтомс местной тевтнень, вети муниципальной ули-паронть марто сюлмавозь тевтнень. МР-нть улить эсензэ государственной тешксэнзэ: Гербезэ, Гимназо ды Флагозо. РФ-нь Конституциянть ды федеральной законтнэнь лувсо МР-со важодить государственной властень федеральной органонь территориальной структуратне. Сынст тевест республикасонть РФ-нь Президентэнь политиканть топавтоманзо коряс вейсэнди Приволжской федеральной округсо РФ-нь Президентэнь полномочной представителесь ды МР-ва сонзэ аравтовт Главной федеральной инспекторось.
|
|
|
Сехте эрявиксэсь 
